港股真係勁，噚日大陸股市喺特區未開市前已因（又）吹風話祖國逼銀行放債嘅意志有所動搖，（又）即時跌到趴街。不過唔使驚，跌市唔和諧，相信中央會繼續指揮啲銀行，隊錢出門口。
花旗股市不跌之謎
不過，如果中央要銀行閂水喉，唔使配股或IPO抽水走，現水平都已到黐線高位。究竟抽唔抽水，家係大陸政府出現最大政策勢力鬥爭。
這邊廂，代表着未來如果有更開放、自由經濟嘅控制者（即係做央行嘅人民銀行），佢哋一定反對胡亂借貸，因為雖然經濟差，令社會唔和諧，但有銀行因太多壞賬而出事嗰陣就仲大鑊。
另一邊廂，就係代表着過去嘅計劃經濟，乜都要政府指點嘅年代中嘅話事單位（即係國務院），佢哋要跑數，要出盡法寶去「保八」。大家見到人行對國務院互毆，真係一場決戰紫禁之巔。
睇番花旗國，下個禮拜（又）嚟破紀錄國債拍賣。上個禮拜嗰次睇落「好成功」，雖然咁抽水，不過息冇升、股又冇跌。
點解息冇升？因為有聯儲局大手掃貨。
點解股又冇跌？因為雖然全球散戶開始拋貨，大戶、有錢佬就繼續買。因為佢哋覺得伯南克好認真咁摧毀美元，所以一定要買嘢脫離美元魔爪。
大家睇實美元，弱勢持續，有錢佬都要繼續買股票，市要繼續升就惟有要咁做。
孫柏文
http://phatdat.blogspot.com