3年前由多蒙特加盟阿仙奴嘅捷克中場路斯基（圖），真係名副其實嘅「玻璃人」，先排因膝傷而休息咗18個月，早排復出冇幾耐可以打吓季前熱身賽，點知唔好彩，日前喺練習時整傷大腿，又要唞6個禮拜，去到9月中先可以落場比賽。阿仙奴原本已有法國中場拿斯尼斷腳唞兩個月，家陣連路斯基都冇埋，搞到領隊雲格頭到痕埋。話時話，我求大俠有樣嘢好唔明，點解由德甲加盟嘅球員藥煲成咁，好似喺車路士嘅德國中場波歷克（拜仁）、利物浦嘅瑞士後衞菲臘迪根（多蒙特）同埋曼聯嘅英格蘭中場夏格維斯（拜仁），同路斯基等都係出名容易傷。唔通德國球會喺賣球員俾英超球會前，做咗手腳？