筆者前日估中大市會繼續跌，小型震倉進入白熱化階段，筆者曾經話股市表現似有精神病，但昨日就連精神病人都話「嘩？有冇搞錯？」昨日個股漲跌互見，十分混亂，有朋友問到底有甚麼啟示？講真，士佳都睇唔明。其實做投資，不能為解釋而解釋，市場上一買一賣，各有不同理由，唔係日日有形態，筆者自家技術分析，有時可以捕捉到機會誕生，亦幫手避開陷阱，不過，有時全日都係一句「黐線」。
後市走勢不會太差
遇上這種市況，投資者應該如何自處？大市上冲下洗，有時嚟真，有時靠嚇，投資者首先要問清楚自己，注碼分配上有冇出現問題。如筆者所言，大市現時十五十六，如果做大咗，超出自己的承受範圍，隨時會在恐慌中出貨；但如果注碼較細，趁大市向下，應該制訂目標，在甚麼水平回補股票好倉，因為每次下跌總有壞消息伴隨，到時說不定會唔敢買。無論買定沽，事前肯定係最清醒，入市計劃應一早諗好。
再者，經常太在意股價升跌未必係好事，一向睇日線圖的，不妨睇吓周線圖，一向分析個股的，不妨轉去分析行業，保持適當距離，才不會被市場牽着走，其實筆者老友阿金的一句「戒急用忍，便宜要貪」，正好用來形容市場目前情況。
最近幾日上升的，都是一些早前落後或受壞消息困擾的個股，例如中國移動（941）及旭光（067），其他之前飆升的個股已略有疲態，無他，之前大市炒復蘇概念，炒到㷫烚烚，炒概念最重要有想像空間，不過近日業績期，市場要暫時放下想像力，而公司又未及交出好成績，資金惟有轉吼落後股，好似中移動早前到台灣投資，市場似乎不甚看好，但日前傳回歸A股，即時為此股加上原料。
雖然筆者認同高手老友阿金所言，大把現金何必發A股，可能只係傳聞居多，但市場既然選擇炒一轉，咪一齊炒吓囉。不過昨日一升，不妨轉吼一些以前落難，之後卻會受惠國策的個股，例如中國石化（386）及電力股等等。
至於大市，雖然似升又像跌，但睇股都要睇大圖畫，美滙指數近日倒水，港股應唔會太差，所以大市調還調，筆者仍然不改自己的好友身份。
張士佳