成日有市民投訴去報案時遭阿Sir狂㩒case唔肯落簿，不過，個別環頭嘅警員卻好有承擔。件事係咁嘅，本土行動為幫朱凱迪、何來籌27萬元找司法覆核條數，喺網上發起「十蚊掟響律政署」行動，同呢件事完全無關嘅鄉事派元朗區議員鄧胤楚，前日無啦啦收到兄弟電話，問佢係咪用[email protected]呢個電郵地址，發信叫人支持「十蚊行動」。
鄧胤楚個電郵係[email protected]，佢擔心有人網上行騙，於是走去報警，議員報案，警察不敢怠慢，拿拿聲派CID邀請負責籌款嘅林靄雲問話。阿靄盡好市民責任應酬警方，解釋呢次籌款歡迎大家上網認捐，但冇發電郵募捐，佢又批評警察擾民，質疑政府浪費警力搞小動作打壓社運人士。警方發言人證實有人報案，懷疑「一個電郵而發件者的電郵地址與其個人電郵地址相似」，由元朗分區跟進。