投資中資股，無論國營抑或民營，最大風險並非源自業務與盈利能力，而在於「人」。人心難測，任憑你係幾優秀嘅分析員，都唔係管理層肚裏面條蟲，又點估得中佢下一步會搞邊科。
正如近期被關進秦城的中石化（386）原老總陳同海，出事前根本好少人會懷疑其個人操守對上市公司有何影響，公司每年營業額過萬億元，區區兩億元賄款似乎算不上大數目，無人摷出嚟講嘅時候，一切揮霍好似都不成問題，10億元辦公大樓建設費、2億元裝修費、1200萬元大堂吊燈，平時被視為錦上添花嘅習非成是，在落井下石之際便成為被批鬥項目。有否想像到假如紅籌老總唔係炒燶咗阿Q，佢可能仍然係公司嘅福星。
民企亦好不到那裏，市場一向唔鍾意國美電器（493），唔係由於佢盤生意而係佢嘅管理層，多年前嘅歐亞農業，明顯打擊咗內地民企投資吸引力，對忽然富貴嘅上市民企老闆，股民始終有保留。
高層出事估佢唔到
最新一宗始料未及之突發事件，來自一向較看好之中核國際（2302）大股東中核集團。集團為內地最大核能發展和營運商，是中國唯一建立完整核科技工業體系的特大型國有獨資企業，是中國核電站的主要投資方和業主，是核電發展及技術開發的主體，是核電設計、核燃料和核技術設備供應商。
然而昨天開市時段，突然有報道指該集團黨組書記兼總經理康日新涉嚴重違紀受查。此君畢業於上海交通大學反應堆工程專業，科班出身又係黨員，亦曾為黨中央紀律檢查委員會委員，當大家發現其名字夾在一大堆來自各省市被調查官員名單之中，詫異之餘，即使其名字不在本港上市子公司中核國際董事局內，仍難免觸發其股價即時插水，結果埋單仍跌18%。
個人相信，正如中石化，一個人不會污染整家公司，但市場最不喜歡不明朗因素，尤其股價自上月初8.78元批股後，已累積近四成升幅，對得住班承配人有餘。反正人家5蚊你唔吼，10蚊去接貨又真係幾牙煙，皆因上市公司原本壓鑄業務盈轉虧才賣殼，新業務具前景卻未有貢獻，手上現金多的是，舊年年底有4億元，最近批完股又再加多4億元，資金充足卻有待日後如何發展及投資，不要忘記，股價最終背靠的還是盈利。
胡孟青