陳慧琳（Kelly）嘅乖仔劉昇（Chace）下星期一（10日）就滿月，但Kelly怕豬流感，決定唔擺滿月酒。為答謝親友送嚟賀禮，Kelly同老公Alex（劉建浩）呢排都諗到頭痕，朋友建議佢送雪茄，但Kelly覺得唔健康，同Kelly合作無間嘅美心餅店就提出贊助禮物，仲特別為Kelly度身訂做咗杏仁酥禮盒，長條形嘅杏仁酥驟眼望去都幾似雪茄，當然啱晒潮媽Kelly嘅心意。
飲魚湯谷奶
聽聞美心日內會為Kelly趕製逾千盒禮餅饋贈親友同fans，畀佢下星期一送出去，Kelly噚日好開心話：「呢樣禮物大人細路都啱，杏仁條外形仲好似雪茄㖭。」
據悉Kelly諗住下月復出，馮仁昭八到佢坐月期間推咗登台同剪綵活動，夾夾埋埋成10個工作，損失過百萬，但有仔萬事足嘅Kelly一啲都唔肉痛，有指佢下個月會演出無綫慈善騷《星光熠熠耀保良》，仲會同李克勤合作，不過Kelly助手Leo噚日話：「未落實，要等公司安排。」
講到湊B心得，Kelly話：「Chace家已經差唔多9磅，佢好大食，每隔兩三個鐘就飲一次奶，佢又好鍾意聽我同佢傾偈，佢會一邊咿呀，一邊笑。」餵人奶嘅Kelly為咗囝囝食得飽，狂飲奶奶炮製嘅魚湯補身。