轆Book：50萬挑機　日系戰神變拉利

轆Book：
50萬挑機　日系戰神變拉利

法拉利F43016M，火紅車身加大量碳纖，澎湃戰意及480萬身價同樣嚇人。有改裝高手懶理16M有幾勁幾屈機，依舊力撐日系戰神GT-R，外觀上，近九成換上碳纖，比16M玩得更徹底；骨子裏，馬力勁谷至600匹，比16M足足多90匹。16M限量499部？火紅碳纖GT-R更係全球獨一無二！

記者：徐影龍
攝影：陳陶鈞
查詢：KCRacing（31628779）

12萬豪玩碳纖

GT-RR35本身真係幾完美，好多數值出廠前已調校到最Perfect，換吓胎軨已夠照。專改辣車嘅KCRacing不甘於此，花五十幾萬買架GT-R返嚟，先揼12萬喪換全車碳纖Parts，由頭、尾、頂到側門都係Carbon料，連車底幾塊泥板都唔放過，幾乎成個車殼換過晒。總舵手Phillip花錢花工夫，原來唔係純粹貪靚，「我將頭同尾拆走，重新設計過輪廓，方便車外加擾流同改入氣位，亦令內部有更多改裝空間。換碳纖主要想偷輕，但全車黑色唔靚，部份噴番紅色效果會更出。」點估到成架GT-R都係碳纖咁重本，但「火紅黑骨」又真係有幾分拉利味。車頭加長咗，整體感覺無原裝咁「橫」，用輕化輪圈配薄胎，但我最欣賞係四隻角都有嘅細擾流，好似魚鰭咁，交叉互搭好有立體美感。

■拆頭重建後嘅R35，比原裝修長，各有各靚。

■駕駛艙出奇地改變不大，保留番R35嘅味道。

■後排座椅都換埋碳纖，中間仲夾住低音喇叭，齋要型。

未換Turbo已達600匹

唔係得個樣，火紅GT-R有本事挑拉利機，性能馬力同樣驚人。Phillip話機件花咗約40萬去改。工程師Rick話GT-R最大問題係無乜改裝件，好多都要自行設計，首要係換番副Haltech靚腦，軟件專門針對R35嚟調校。Rick一邊用Notebook示範改電腦Mapping，一邊講解由空燃比到火嘴點樣Set，「Boost嘅Bar數亦由0.9增強到1.8，數字上好厲害，但基於安全同保護引擎理由，最後目標會改為1.2至1.3。抽走尾鼓，令尾喉盡量直出，唔似原裝咁要屈多兩個彎。喺車房嘅跑步機上測試過，呢架GT-R去到超過600匹，不過仲有好多地方要改同Turn，嚟緊我哋上珠海試車速，之後會換埋大Turbo，正式落場鬥車。」600匹已經比Mine's版甚至Spec-V都勁得多，換埋大Turbo後真係不敢想像。

Phillip

■碳纖頭唇、裙腳唔噴紅色，加埋細擾流板，紅黑夾得超靚。

■碳纖頭冚加入大風口，幫助引擎散熱之餘再谷戰鬥格。

■「35」拉花唔止講R35，仲係車主Phillip嘅鬥車號碼。

■巨型「餐枱」尾翼，高高凸起，支撐位雕埋GT-R車徽。

■車尾底部如欄柵般嘅擾流板，擺明參考拉利F430。