股海形勢似乎真係有些少唔妥，周一滙豐控股（005）派完成績表後，股價連日急升，但市場上唔少股份都腳軟，有傳言指大戶托住「大笨象」出貨，不過，亦有唔少醒目散戶當滙控派完成績表，就沽貨撤退。
其實散戶最怕係乜都唔知情況下，隻股突然大跌。好似曾受市場注目之中核國際（2302），昨大插18%，收報10元。市傳母公司有高層因涉嫌嚴重違紀，正接受調查，導致股價大散。呢類無從預知的風險最難避，另外最慘係該股買賣盤疏落到暈，要一次過掟貨出街幾乎唔可能，若然有「打靶盤」被迫打靶，股價隨時大幅乾跌，十分濕滯。
候35元吸納
提起股價無端大跌事件，即時諗起東方海外（316），7月中曾出現1分鐘狂插33%事件，懷疑係場外衍生工具交易所累。
不過，東方海外股價翌日即撥亂反正，而且仲一路炒上，前日創出52周高位47.20元，昨跟隨大市跌1.9%，報46.20元。大市面臨調整，東方海外有見頂迹象，待股價回落至35元水平再考慮吸納。
方星俠