左丁山放長假冇乜可能，對朋友詹可以去意大利Tuscany及法國南部旅遊一個月，只能得個恨字。放三兩日短假就OK嘅，但係仲要一早安排。前幾日就經一番左度右度之後，幫襯國泰假期，去咗吉隆坡三晚四日。人在吉隆坡，居然要晚上上網聽香港電台新聞，急急睇CNN，先知道吉隆坡在八月一日上午發生示威事件，警察要放水炮鎮壓。當時人在何方呀，就係在唐人街之蘇丹街（JalanSultan）與茨廠街（JalanPetaling）行嚟行去，跟住去MetroJayaTimesSquare，呢個商場大到無倫，將新城市廣場、又一城、太古廣場、置地廣場加埋一齊，都唔夠佢大，商場內人頭湧湧，完全唔知道吉隆坡另一個地區有示威喎！
上次到吉隆坡，係二○○二年之事，住在文華東方酒店，就在雙子塔隔籬，到雙子塔商場方便到極。你知啦，我哋到東南亞國家首都渡假，並非尋幽探勝，考古尋根，純粹只為學習蔡瀾皮毛，講飲講食而已。自己在香港極少逛商場，去到外地就不妨睇吓人哋點樣組織、建築商場；一睇之下，就知道吉隆坡比香港有過之而無不及，人哋地方大，地價較便宜，故此商場大到不得了，並非意外，但吉隆坡之商場，由二十幾年前之金河商場到市區內名牌林立之Pavillion，確實有飛躍進步，組織能力驚人，譬如Pavillion之地下foodcourt，就大到香港無法子追及。在此碰到退休賓架L一家四口，賓架L話Pavillion之foodcourt由FoodRepublic主理，與新加坡之義安商場foodcourt相同，特色就係食物攤檔多，食物款式多，而且價錢唔算好貴（當然比外間小販食檔貴），總之乾淨衞生，食得開心。呢度有兩個香港人都熟悉嘅招牌，一個係翡翠拉麪，一個係香港蛋撻王，生意甚佳，一個特色檔係ToastBox，買多士者要排隊，可見有料到。左丁山食完蛋撻王再吃加央多士，幾乎唔想再去吃晚飯。