新一季英超唔夠10日就開波，衞冕嘅曼聯傳出首席門將雲達沙左手骨折，須掛免戰牌8星期嘅不利消息。好明顯，期間無論由賓科士打或者古斯錫把關都難畀人十足信心。佢兩個會騰，曼聯躉亦會騰，但唔代表領隊費格遜會騰，話晒曼聯近季慣性開季出閘脫腳，今次缺少個主將，咪當再「讓賽」多一次囉，使乜驚？
費Sir日前講到今季爭標，一方面堅持冇咗基斯坦奴朗拿度（C朗）都掂，相信一班老臣子，同埋以馬捷達、路爾斯安達臣、拿尼同韋碧克為首嘅「8小福」會發揮得好；另外，佢又明踩利物浦唔夠班，唔放紅軍在眼內喎。
我求大俠唔知費Sir講呢番信心爆棚嘅說話時，知道咗雲達沙要唞近兩個月嘅消息未，但相信都無損佢信心。又係嘅，曼聯對上兩季，分別因C朗季初停賽或者養傷影響成績（前季頭3場不勝，而上季頭4場贏得1場咁大把），但最終何嘗唔係後上封王？
賓科士打料擔大旗
38歲嘅雲達沙，係喺早排對拜仁慕尼黑擋柏拉積嘅12碼時受傷，據報係手指骨折，佢缺陣，賓科士打同古斯錫是旦一個會頂上，斷估賓科士打機會高啲。自從賓仔喺今年3月英聯盃決賽，出到睇iPod救12碼呢招幫曼聯捧盃，逐漸得寵，好似早排亞洲之旅獲重用，就算對FC杭州失兩球波顯得騰騰震，都未至於一鋪打柴嘅。
再講，曼聯嚟緊禮拜日對車路士場波係社區盾，查實會方對呢個賽事不嬲唔算好重視；之後曼聯喺聯賽對伯明翰、般尼及韋根，到月尾至主場迎擊阿仙奴，對兵工廠前有咁多場機會畀賓仔熱身，話唔定會逐漸建立信心。換個角度諗，雲達沙到今季尾約滿，遲早換人，趁早操賓仔都未必係壞事。講到呢度，假如波友堅持對26歲嘅賓仔冇信心，咁咪唔好博曼聯上季長旺嘅零失球波膽囉。