大埔林村許願樹長年香火鼎盛，無數善信掟寶牒祈福，搞到棵樹不勝負荷折斷，家要小心保護養命，改用另一棵膠製仿真許願樹畀市民掟寶牒，噚日林村鄉公所副主席陳灶良搵八方，剛剛打完風，八方暗忖莫非許願樹有乜三長兩短，點知原來係報喜。
自學英文壓英中學生
陳灶良話接獲街坊通知，有個6A會考生今日會到許願樹還神，報答許願樹派A隆恩。據佢講，有廿四孝父母今年初帶埋讀中五嘅仔去許願樹祈福，希望會考有好成績，噚日放榜果然得償所願攞到六條A，當然還得神落。
去文武廟求進士登科八方聽得多，求許願樹派A都係第一次聽。呢位許願成真6A考生叫吳奕偉，佢成績標青，除咗多得許願樹顯靈，自己努力應該更加重要。奕偉小三由內地移居香港，當時連26個英文字母都唔識，好彩老師幫佢補習，升小四時已追上，後來更成日考到全級第一名，中、英文成績都名列前茅。
奕偉之後入讀屬中中嘅葵涌東華三院陳兆民中學，由於上堂時接觸英文機會比較少，所以佢會搵機會自學，學好英文秘訣係多睇英文報紙、聽英文電台同用英文寫日記。痛下苦功，奕偉中一時已力壓英中學生，奪得「中英文別字擂台」中學組英文別字擂台冠軍。
唔止英文水平媲美英中學生，奕偉中文、數學科成績都唔錯，中二時獲得葵青區中小學網上閱讀計劃暨寫作比賽優異獎，又攞過培正數學邀請賽良好表現獎，前兩年更獲提名參加「特別資優學生培育支援計劃」，可以話係年年攞獎嘅學生。陳兆民中學會考平均及格率九成，07年有個6A學生。
雖然忙於應付會考，奕偉都參加咗港鐵主辦嘅「Train出光輝每一程」計劃，據佢自我介紹，「下雨天阻不了我跑步，崎嶇的山路擋不住我前進，失敗的滋味逼不到我放棄。」家去許願樹只可向仿真樹掟迷你版寶牒，許願有幾靈，八方冇考究，正是信者有，不信者無。八方問陳灶良向許願樹還神有乜習俗，佢話新界人多數會預備三牲祭品，不過一般人唔使咁大陣仗，向棵樹講聲多謝關照就得嘞。
mailto:[email protected]