本欄的讀者，對昨天的跌市應唔會感到意外，筆者前日平掉投機部份，可算時來運到，讀者如果有心，昨天早上亦有機會走個靚價。
筆者自從認定隻牛，一直都係累積倉位，甚少叫平倉，但前日在自己網站及昨日在本欄通知各方友好，平掉投機部份，是近月來的首次。有朋友問筆者，為何平得咁急，一支陰燭而已，唔係咁關鍵嘛？當然唔係因為一支陰燭，主要係兩個原因，一是期指由07年頂部31948下跌至08年10月10567，反彈黃金比率50%，量度價位是21257，前日最高見過21210，相差47點而已，算做到價，為大市平添一份壓力。
較為常用的黃金比率有38.2%，50%及61.8%，那是否到價就要先走呢？那又未必，最重要是看市場如何看待這些反彈水平，如果見市場視反彈水平如無物，輕易升破，我們可安心持貨；但若見市場到此水平，造出近最高開、最低收的冇手冇腳陰燭（如昨日），那大家就要尊重市場決定，避一避了。
極其量回調至19000
另一個原因是日前首次升高於250日線上30%，我們發覺此水平經常為大市形成一阻力，如果在牛三之時，更可能係牛轉熊的徵兆，但現在才剛牛二，不虞轉勢，但配合黃金比率，可以是避一避的訊號，筆者遂平掉了部份投機倉位，以及一些持有了一段時間的炒股，例如吉利汽車（175）、中國資源開發（661）、興業太陽能（750）及中核國際（2302）等等。
其實筆者對後市一點都不擔心，22800只是最保守估計，23800應該都唔係難事，但為何前天仍要出貨？皆因性格使然，如果閣下能泰山崩於前都面不改容，那就可以唔理，但最怕是跌5%時唔沽，跌10%時又唔沽，跌15%時才頂唔順先沽。筆者自己知自己事，投機唔係過人世，倉位又重，投機部份揸嘅股都是以炒為主，情願低位補回。
這次小震，對於未入齊貨的朋友來說，是一個機會，筆者估計小震充其量回調至19000水平，因為但凡牛市，必定在250日線上留有一至兩個裂口，現在最低的裂口在18913，這是極端低價了，至於會唔會回到那麼低？筆者唔知道，但主觀覺得唔會，所以挨近兩萬已開始補貨，今日可能是小震的白熱化階段，筆者會開始分段補回投機倉位。
張士佳