無綫電視呢排可能當黑，連訪問天主教香港教區主教湯漢嘅新聞報道都惹嚟風波。話說無綫新聞上周五喺六點半新聞播出湯漢專訪，湯主教表明唔提倡校本驗毒計劃，之後有傳媒形容湯主教同煲呔唱反調，天主教社會傳播處更發表聲明，指TVB播出嘅訪問曾作剪輯，令湯主教言論受誤解。
負責訪問湯主教嘅無綫助理採訪主任李家文不甘孭鑊，即刻好認真唔是但翻睇訪問錄影片段，逐字逐句抄錄下來，噚日喺報章刊登公開信澄清報道冇誤導，並引述傳播處稱，教區嘅聲明只係回應個別報章評論，並非針對無綫。TVB以往罕有高調反駁批評，今次出手，當然獲最高層同意，免得新聞部食死貓，令人以為佢哋真係「事事旦旦」。