早排黃師傅話過，五百同一千蚊紙為法定貨幣，點唔願意都焗住要收。有行家即時對我好有意見，話無法例指定要硬啃。即係咁，根據道路交通（公共服務車輛）規例（香港法例第374章），的士司機須攜帶不少於$100零錢作找續。無錯，即係話我哋無義務要幫人打散大牛同金牛啦，不過人哋都有使用法定貨幣嘅權利，雖然乘客都有責任準備零錢，但係如果對方真係無，你又堅持唔收，咁就要睇埋法例中嘅另一則規定啦。就係若司機兜路車客人去㩒機或暢錢，但咪錶繼續跳，就有可能犯咗濫收車資條例，行家們要小心。講完紙幣，原來硬幣都有法定拒收嘅準則，若$1以上大銀，乘客畀超過$100才可拒收，司機亦可拒收$2以上嘅「神沙」，以上條例適合所有消費場合。雖然有晒指引，但好多時都係要互相體諒，為找續爭執，我會盡量避免囉。
文：黃師傅