民主女神余若薇噚日化身模特兒，拍住自由黨周梁行處女catwalk，再表演聯手踩o靚模。余大狀話模特兒係正當職業，但就對家o靚模嘅發展有啲擔心，覺得情況唔太健康，「佢哋係賣弄性感、賣弄女性身體，多過係正式模特兒。」
唔好望一步登天
余大狀噚日喺港台邀請下，拋身為得200元budget嘅年輕人做model，被問到可否吊帶、露背上陣時，余大狀話女性有番咁上下年紀不宜性感，又坦言覺得用200元為佢造衫係好大挑戰，唔係因為佢着開名牌，而係因為佢身材高大，買布都要用好多錢。
高人余大狀透露結婚時好恨着中式裙褂，可惜走勻全港都買唔到合身，件裙褂唔係袖太短，就係個領扣唔到，最終佢含恨着婚紗出嫁，點知婚紗裁縫指佢生得太高，要用多啲布料，投訴做蝕本生意。
做電視出身嘅周梁，噚日亦話o靚模博上位手法太快，無疑係成名捷徑，但能否持久冇人知道，奉勸後生仔女唔好奢望一步登天。闊別公仔箱多年，周梁9月為有線主持時事talkshow，佢幾十年前做電視時係香港第一代天氣女郎。