孫耀威曾到日本發展歌唱事業，與近日神秘失蹤的酒井法子同屬一公司，二人更於94年合唱一曲《有緣千里》。老孫昨日表示當年每次到日本酒井都會寫信以及送電器給他，唱片公司和酒井的媽媽又慫恿他展開追求。
孫耀威、黃曉明和周渝民昨日到時代廣場出席聯合國兒童基金慈善跑2009記者會，曾與酒井法子合唱以及份屬同一唱片公司的老孫，被問到有關酒井在老公高相祐一因藏毒被捕後攜子失蹤一事，他說：「我都係睇報道先知，我同佢有一段時間冇聯絡，2000年知佢結婚，自己又係男仔，唔係咁方便。」
「我同佢都幾close」
老孫透露當年到日本發展得到酒井悉心照顧，他說：「佢超級超級照顧我，我同佢都幾close，每次到日本佢都會寫幾頁信畀我，知我鍾意電器每次都送畀我。佢兩母女好sweet，食飯時好照顧我，差唔多餵埋我，好似食殘廢餐一樣，日本女仔真係dreamgirl。」老孫指唱片公司工作人員以及酒井母親曾慫恿他展開追求，但當時因有女朋友故打消念頭，他說：「曾經都心動過想一齊，自己有女友就冇多餘諗法啦，當時諗佢又大過我。」
問到老孫當年是否感覺到女方對他有意？他說：「唔可以咁講，佢係友善，每次寫信嘅下款都會寫永遠的朋友，就算示愛都係我做啦，最後都冇做過，亦都冇後悔唔追佢。」問到老孫有否就酒井失蹤一事聯絡酒井的母親，他表示透過台灣舊同事聯絡酒井公司，他又說酒井此舉可能想逃避傳媒，他說：「希望佢唔好做儍事，韓國已經好多藝人自殺，唔想呢啲風氣傳去日本。我自己做咗10年都明白壓力好大，捱過之後又係一片天，我喺網上都叫fans為佢祈禱。」老孫又指當年唱片公司已有一女星為情自殺，他不想再有同類事情發生。對於酒井丈夫身上藏有興奮劑，他認為毒品害人不淺，更希望酒井早日開記者會，好讓大家放下心頭大石。
大方祝福應采兒
此外，老孫被問到前女友應采兒向陳小春逼婚一事，他大方向二人送上祝福並說：「阿丁（應采兒）係好女仔，邊個娶到佢好幸福。」不過同樣身為應采兒緋聞男友、曾合作劇集《鹿鼎記》的黃曉明則表現尷尬，問他是否不會為對方送上祝福？他說：「我會祝福她，我沒有尷尬，我跟她是緋聞，沒那種事情。」
周渝民則指前女友徐熙媛（大S）與古天樂秘密交往一年是緋聞，他說：「我不知道，不能夠講甚麼，不是真的，是緋聞，人要選擇對象會自己選，我會向她送上祝福。」
採訪：王連連
攝影：陳俊強、陳志嵐