今屆荷甲啱啱開鑼，我求大俠已經損手，無他嘅，鬼叫自己喺上個禮拜六重槌衞冕嘅阿爾克馬爾（AZ）可以作客贏荷華高斯，結果AZ爆冷輸2:3。跟住喺禮拜日諗住追數，更加重槌燕豪芬可以喺主場擊敗升班馬芬洛，點知打和3:3。
不過，睇到芬洛嘅日本中場本田圭佑喺嗰場波一傳一射都咁美妙，啲波數又真係抵輸嘅，而本田圭佑更加憑呢場波一炮而紅，受到燕豪芬同埋多間歐洲球會嘅注意。
兩年前訪港入衝力罰球
可能香港嘅球迷對今年23歲嘅本田圭佑好陌生，但其實大家早就有機會喺現場見識過佢嘅威力，因為日本兩年前曾經喺北京奧運預賽作客香港，當時日本以4:0勝出，而本田圭佑喺比賽中就射入一記衝力罰球，個波喺空中突然轉方向，好勁o架！唔記得？大家可以上 http://www.youtube.com/watch?v=WVIdfNOfUO8&NR=1重溫。
講番本田圭佑，原本喺名古屋鯨魚效力嘅佢，多得前鯨魚嘅荷蘭籍教練韋古臣引薦，將佢帶咗去荷蘭東邊，近住德國杜塞爾多夫嘅芬洛；而本田圭佑亦冇令韋古臣失望，可以踢左閘同埋中場嘅佢，好快就取得球隊正選位置，仲贏得新中田英壽同埋新中村俊輔嘅美譽，而荷蘭傳媒仲話本田圭佑可能係繼小野伸二之後，荷蘭球壇最好嘅日本球員。
燕豪芬一早想撬
有麝自然香，本田圭佑喺荷蘭踢得咁好，自然多球會打佢嘅主意，包括阿積士、利華古遜、加拉塔沙雷同埋富咸等；而早喺今年年頭，就已傳出燕豪芬對佢有興趣，而且仲一直傳到呢個夏天；可惜，由於芬洛企硬要1,000萬歐元（約1.2億港元）轉會費，所以先至冇成事。之不過，經過喺荷甲開鑼戰本田圭佑咁射死燕豪芬之後，燕豪芬可能好後悔冇一早將呢名左腳仔收歸麾下。好彩，轉會窗到8月31日先關閉，燕豪芬家出手都未遲，至於芬洛會唔會坐地起價，就好難保喇！