如無意外，中學會考今日放榜，o靚模曹卓榣（Cc）、江若琳師妹林司敏和名模馬詩慧的長女王曼喜，都會收到成績單。無論成績好壞，昨日獲選動漫節ImageGirl冠軍的Cc，雖表示以平常心面對會考，但連成績單也懶得拎，只交由母親代勞，自己寧願綵排catwalk，食住o靚模熱潮搵快錢，反觀馬詩慧則堅拒讓女兒輟學當o靚模。
倘若熱帶風暴「天鵝」生生性性，中學會考今日放榜，會考放榜是人生其中一個重要時刻，不過有人擔心前程，有人則愛理不理。現年17歲的o靚模曹卓榣（Cc）是應屆會考生，修讀文科的她自言以極輕鬆心情面對會考，昨日在動漫節ImageGirl選舉奪冠獲頒12,000元獎金的她，被問到對放榜成績可有信心時，她只說OK，但避談估計自己可取得多少分，就連成績單也不會親自去領取。
當選ImageGirl冠軍
Cc昨日透過助手回應說：「我聽日有工作，我打咗返學校問老師，佢話家人代領都OK，所以媽咪會幫我去拎成績單，然後第一時間話番個成績畀我聽。」原來她今日要為明天舉行的一個酒店周年派對綵排catwalk。
近日人氣勁升的Cc，既在書展推出寫真集又參加動漫節ImageGirl選舉，昨日更捧走冠軍兼贏最喜愛造型大獎，穩袋12,000元快錢，難怪她恃着動漫餘熱，乘機盡地一煲搵銀，實行得幾多得幾多。
Cc寧搵錢不顧會考成績，但名模馬詩慧（Janet）和王敏德的長女、現年17歲的王曼喜（Kayla），今天則會獨自返校取成績單。就讀名校瑪利曼文科的Kayla對會考緊張萬分，Janet愛女心切，長期安排她上補習班。對於女兒的成績，Janet昨在電話中說：「一切米已成炊。我諗佢（Kayla）都會有啲緊張，不過今晚都冇得出去relax，佢仲要去學法文。」
馬詩慧禁女輟學入行
近日o靚模風氣盛行，會考6分的周秀娜半年內狂賺400萬，甚至有o靚模未讀完中五便打算輟學投身娛樂圈，Janet卻堅持不讓Kayla輟學做o靚模，她說：「我諗Kayla唔係嗰個type，家最基本都要讀到大學啦，玩票性質行吓騷就冇所謂。」
至於江若琳師妹林司敏也是會考生，她對放榜信心十足，但不敢估計可得多少分，她昨日在電話中說：「講真都幾緊張，我聽日會平常心返學校拎成績單。不過就算成績達標，我暫時都唔打算讀預科，我會選修普通話文憑課程，我覺得自己比同學幸運，就係已經踏出社會工作，仲可以揀到自己鍾意嘅演藝工作。」
發哥：得失唔係咁重要
求學不是求分數，無論會考成績優劣，並不代表前途就此有定案，從未考過會考的周潤發昨日在電話中勉勵應屆考生說：「得失唔係咁重要，人生好多階段，完成學業投身社會係另一個終極考驗。」他又建議失意的考生視乎家庭經濟能力，不妨考慮重考，因今年投身社會或會碰上經濟不景，發哥說：「唔怕，諗清自己路向先朝目標進發，自己肯努力用功，總會有出頭天，我都冇讀過大學，又冇考過會考，經過努力一樣打出一片天。」
採訪：比華利、王崇穎 攝影：陳順禎
娛樂資料庫：娛圈才子孫耀威
今日是會考放榜大日子，已畢業N年的你，還記得會考分數點計嗎？取6科最高分成績，A有5分，E得1分，最高30分。娛樂圈中其實不乏高材生，孫耀威當年考得28分堪稱才子，大導演劉偉強78年考會考，考獲8個H，與裕美、陳小春一樣捧蛋而回。
《高分組》
孫耀威：28分、梁雨恩：27分、莫文蔚：27分、林夕：26分、森美：26分、羽翹：26分、梁詠琪：24分、袁彌明：24分、李嘉欣：21分、陳志雲：21分、謝安琪：21分、G.E.M.：21分、林一峰：21分
《缺考組》
周潤發：中三輟學、林子善：中三輟學、梁洛施：中四輟學、張致恆：讀至中五但沒考會考、吳卓羲：在職業先修學校讀完中三，但沒報考會考、胡心諾：中四被踢出校、周凱盈：中四主動退學
《低分組》
Lavina：14分、傅穎：14分、Angelababy：13分、林子聰：第1次3分，第2次有11分、余文樂：第1次7分，第2次10分、鍾欣桐：10分
鄧麗欣：9分、林二汶：第1次6分，第2次9分、鄭希怡：第1次5分，第2次6分、周秀娜：6分、趙碩之：5分、蔡卓妍：5分、黃又南：3分、Kama：2分、林超賢：2分、JaniceMan：2分、吳日言：2分、李彩華：1分、楊愛瑾：1分、徐天佑：0分、裕美：0分、陳小春：0分、劉偉強：0分（8H）
資料來源：《蘋果》資料室、互聯網