雖然俗語有話「虎父無犬子」，但有時呢句說話就未必啱得晒，體壇就有唔少未能「子承父業」嘅例子，好似湖人前鋒禾頓雖則今年贏咗總冠軍，但作用就唔似得老父標禾頓嘅級數；而禮拜一F1亦出了個未能繼承父志嘅失敗例子，雷諾車隊嘅24歲車手尼仙奴畢奇（圖）俾車隊炒魷，成為今季第2位被炒嘅F1車手。畢奇仔喺被炒後就怒斥車隊對佢不公平，全季都冇俾任何支援佢；之不過今次我求大俠都唔幫呢位仁兄，皆因佢今季戰績奇差，至今都冇一分進賬，更唔好講同曾3奪F1總冠軍嘅父親畢奇相比啦！我求大俠惟有希望畢奇仔唔好怨天尤人，努力改善技術再戰F1好過啦！