泛民考慮五區總辭變相公投嘅建議討論得鬧哄哄，華叔率先彈出一張五人名單，提議梁家傑、何秀蘭、毓民、卿姐同李卓人可以辭職去補選。正當泛民由煲冇米粥到好似有機會生米煮成熟飯之際，八方聽聞左派都腦筋急轉彎，喺公投大戰密謀與西環度出一張五條A鑽石名單搶「公」。
蔡菜子勢何姨姨
泛民搵人辭職大家都好禮讓，左派要人去馬補選，未吹雞已經有人搶韁而出，港島區蔡菜子係必然之選，有福建幫照住，低何姨姨唔係難事，小道消息話呢場世紀之戰，分分鐘連程介南都有興趣落場。九西首選係劉千石，副選有田北辰，兩人都係去年敗軍之將，翻閹上陣單挑毓民，輸人輸陣都唔係重點，最緊要係輸少當贏。
九東方面，嫻姐上年退位讓路畀黃國健，如果有補選，嫻姐名正言順重出江湖，正是聞鼙鼓而思良將，國家需要你嘅時間，嫻姐豈可蹺埋雙手？如果真係由嫻姐出馬，相信可穩炒何一個泛民候選人，選過特首嘅傑哥都未必夠嫻姐鬥。新界東卿姐補選本來應該實食冇黐牙，可惜有個田少吼實呢個位，田少自己有中產票，加埋左派龐大鐵票同鄉事票，掃低卿姐唔係完全冇可能嘅事，就算博和，令卿姐險勝，泛民不能壓倒性當選，都算有交代啦。
泛民難敵新西鐵票
李卓人喺新界西次次都係僅僅熟貨色，要佢辭職補選，真係睇見就牙煙，呢層左派自然心中有數，所以八方聽聞西環都唔打算重鎚出擊，是但求其搵個民建聯新丁，或者工聯會蛋散出選都冇所謂，輸咗當練兵排陣，偷雞成功就一鋪過本利歸來，如果要打穩陣波，大可出動工聯會會長棠哥，若然係佢參選，幾乎可以肯定盡收天下鐵票，所以呢場仗真係冇得輸，咁着數嘅事，何樂而不為？
總辭補選玩公投唔係咁簡單，左派排陣未有定案，其他選舉常客湊熱鬧係意料中事。「煎釀三寶」龍緯汶、柳玉成、梁雪芳應該冇走雞，蕭思江、鄒秉恬、林依麗、王紹爾、莊永燦都係鍾意曝光嘅人，補選擂台冇咗佢哋失色不少，嚟嚟去去都係嗰班舊面孔，你話幾冇娛樂性呢！