自稱要坐月坐足3個月的千億新抱徐子淇，昨日為慈善往尖沙嘴出席雪花秀水療中心開幕活動，她透露下周會為5月中出生的二女曦兒擺發實宴，並笑言現時奶粉超級好營養，將B女吃剩的奶粉餵愛犬，愛犬也即時增磅。
千億新抱徐子淇昨日以智行基金大使身份往尖沙嘴出席雪花秀水療中心開幕，同場還包括林峯及明美連等。5月為恒基二少李家誠誕下二女曦兒的子淇，昨日穿上懷孕時買作孕婦裙的DianevonFurstenberg長裙，她指陀第一胎時不乖，有吃麥當勞及雪糕，今次坐月乖乖吃補品，還打算坐足3個月。
心急再生醫生勸阻
子淇透露很心急再為人母，但醫生指她頭兩胎都是開刀生，要慢慢復原，最快明年才可再生。她指B女曦兒是個巨B，現時已有15磅：「家啲奶粉真係好好營養，B女兩個月已經着佢姐姐1歲時着嘅衫，仲有我唔浪費，將B女食剩嘅奶粉畀屋企隻狗食，隻狗都由toysize變到中型size。」她透露下周會為B女擺發實宴。
感激歸還USB手指
早前本報接獲讀者送交的一枚USB手指，內有徐子淇的私隱生活照，對此子淇說：「其實係我哋畀隻手指叫保安去曬相，好彩有人執到，好感激執到嗰位人士同交番畀我哋嘅《蘋果日報》，真係好好彩，可能經過陳冠希事件有人執到都唔會亂咁擺上網。」問她會否給酬勞予拾到USB手指的人，她說：「嗰個人係直接交畀《蘋果日報》，冇直接見過佢。」至於會否處分該職員？她說：「呢啲公司會處理，佢都唔係專登。」
再問到外間將子淇與梁洛施封為最豪新抱，她說：「我知佢生咗BB，做媽咪唔係計豪唔豪，亦都唔係為咗收禮物，係為建立家庭長遠嘅幸福，做媽咪責任好大，要無條件咁愛一個人，母愛唔係計錢，係需要時間同關心。」問她會否與梁洛施交流為人母心得？她說：「我唔識佢，又唔知佢喺邊。」
採訪：顏英儀
攝影：陳俊強
