你班友扮到鬼五馬六！可能因為當年係喺2號台播，所以我未睇過，不過去親百貨公司總會見到一大堆G.I.Joe玩具，點會唔識？趁住真人版電影聽日上畫，乘勢又要出Game趁熱鬧，今次隻《義勇群英之毒蛇風暴》，有單打有得揀Partner，仲有網上群揪，登場角色多達16個，可以因應關卡揀唔同人，用獨特武器取最佳效果，我就最想扮韓星李秉憲演嘅白忍者，女士們請為我尖叫！
文：阿洛
結束就是開始
改編電影出遊戲已經係例行公事，不過呢隻《義勇群英之毒蛇風暴》就奇怪啲，劇情唔係跟電影同步，而係緊接電影嘅結局發展落去。無所謂嘅，不外乎係恐怖組織毒蛇幫（Cobra）話要征服世界，美國政府派出G.I.Joe瓦解佢哋，深入佢哋個虎穴、取佢哋粒虎子嘅劇情，未睇套戲都可以開機玩。
殺人原來好Casual
遊戲角色有三種軍種可選，包括攻擊力平均而特殊技極強嘅戰鬥士兵（CombatSoldier）、配備重型武器嘅重裝士兵（Heavy），或擅長埋身肉搏嘅突擊隊員（Commando）。難度亦有得揀，最易嘅Casual有無限生命，跌低又會即刻重生，人命何價！高難度啲仲有Advanced、Hardcore。
因了解而開拖
任務模式可以單螢幕雙人合作，遊戲登場角色基本12人，隱藏人有4個，當中包括有SnakeEyes、Duke、HeavyDuty、GungHo、StormShadow等。每個角色都有獨特能力同武器，兩人組隊更多配搭、更講戰術；另外仲有隱藏寶物如75張紀錄卡、加速裝等「無敵裝備」等畀你儲，弊！講開又講，我儲唔齊套可樂玻璃杯呀，爭藍色！點算呀？
Profile
遊戲：《義勇群英之毒蛇風暴》
機種：PS3/Xbox360
類型：動作
發行公司：ElectronicArts
人數：1-2人
50張《G.I.Joe》戲飛等你拎
電影版《G.I.Joe》聽日上畫，故事取材完全沿用番電視卡通及漫畫原著世界觀；事件發生喺15年後嘅世界，因「毒蛇黨」以恐怖手段威脅人類，全球精英即組成精銳部隊，配備最先進嘅武器如：新世代進攻型戰鬥機、核動力潛艇等，誓要鏟除「毒蛇黨」，但「毒蛇黨」的武器亦不甘示弱，究竟誰勝誰負？
係咪好想入場睇呢場決鬥呢？今日洲立影視送出正場戲票給25名讀者（每人兩張戲票）；只要答中以下問題，連同回郵信封寄往：將軍澳郵箱65264號，信封面請註明「《蘋果日報》G.I.Joe」，便有機會得到戲票。先到先得。（如有任何爭議，最終決議權歸洲立影視，《蘋果日報》概不負責。）
問題：演白忍者的韓星名字是甚麼？
