臻美黃乾亨小學暨初中學校停辦，有廿幾個團體想接手，最終花落愛國社團旅港福建商會，唔少落選者忿忿不平，質疑遴選有政治因素。身為唐唐家臣嘅立法會議員林大輝旗下林大輝中學都有入紙申請，咪以為佢後台硬，原來連面試機會都冇。
中學開辦時裝設計
林大輝噚日同八方重提落選都幾心傷，佢指林大輝中學嘅時裝設計科，唔係間間小學都有開辦，咁實用嘅科目對學生有好處，可惜教育局唔識貨。佢話提交教育局嘅10頁辦學計劃書落足心機撰寫，諗極唔明點解連面試機會都冇，唔通旅港福建商會好似陳德霖咁，不作他選？
林大輝中學校董會12號開會時會檢討落選原因，林大輝透露不排除向教育局「請教」點解落選，局方最好透明度高啲，畀佢哋知道死因，否則連邊方面輸咗都唔知，好蝕底咁話。據聞佢哋早前曾向教育局索取申辦評估報告，可惜孫公sayno，有人思疑所謂評估報告係無字天書，入面只得「福建中學」四隻大字。新丁議員林大輝知名度低，佢揚言來年要力谷，有記者建議佢買o靚模攬枕博上鏡，佢好矜持死都唔制。