七月二十二日本欄講及讀者麥來郵，說廣東話好有歷史文化，譬如「晏晝」就比「下午」有意思得多啦。此日碰到肥仔K嘅普通話老師，老師話日日睇左丁山專欄，於是問佢：「你睇得明咩？」老師話：「我在香港生活五十多年，在新亞畢業，怎麼會不明白？」睇得明就好嘞，突然間想起，如果人哋用上海話寫專欄，自己會唔會睇得明呢？
商務印書館在書展前出版一本新書：名《廣州話俗語詞典》，編者共有三位，就係饒秉才（暨南大學教授）、歐陽覺亞（中國社會科學院民族研究所研究員）、周無忌（前廣東人民廣播電台台長），佢哋對廣東方言素有研究。
呢類書，最啱左丁山作寫稿參考用啦，想話認識多啲廣東話，大家不妨買番一本，學習學習，尤其係年青人㖭，好多本港年青人唔識廣東俗語，只識「潮語」，可惜也。
揭開本書睇吓，原來有啲俗語自己都唔識或唔記得咗，可以重溫，例如：（一）阿婆髻，安嘅。即係話阿婆頭髮稀疏，何來髮髻，梗係安裝o架啦；意指編造事實。（二）白露水，冇益人。白露節氣（今年係九月七日晚上八時後）之後就係農曆八月，這時候天下雨水對人或對莊稼都冇好處。（三）斑鳩唔食米，死咕咕。（四）扁鼻哥戴眼鏡，你緊佢唔緊；（五）搽脂粉吊頸，死要面子；（六）窗外吹喇叭，鳴（名）聲在外；（七）牀下底吹喇叭，低聲下氣；（八）大花面叫母親，無錢，粵劇花臉角色在台上用官話叫「母親」，發音近「無錢」。（九）水浸缸瓦舖，盤滿缽滿。
此詞典由A到Z（以漢語拼音劃分），內容有二百七十一頁，加索引二十二頁，每條俗語有解釋，有文句舉例，外省人可看得明白，例如「蒸生瓜，侲侲地」就解釋到：「瓜蒸不熟；侲，形容人愚鈍，侲侲地即有一點兒愚鈍，儍裏儍氣。我話你係唔係蒸生瓜侲侲地呀（我說你腦子是不是有點毛病呀。）」又如另一條，「彭祖尿壺，老積」「彭祖遇壽星，各有千秋」，皆可顯示廣東人說話之富於想像力。此書唯一不足之處，就是沒有解釋諺語、俗語的出處或源頭。大概係篇幅所限之故，如要註釋，本書大概要加到五百頁以上。