今夏由紐卡素以自由身加盟曼聯嘅英格蘭前鋒奧雲，超鍾意跑馬，而喺佢耳濡目染底下，據聞曼聯班球員計劃夾錢買匹賽馬，而且仲諗住擺喺奧雲個倉度，俾奧雲嘅練馬師朋友操「弗」之後，出賽爭獎金。紅魔班球員做馬主，我求大俠覺得都係好事，但千祈咪搞到好似奧雲咁爛賭就得喇。話時話，聽講奧雲有部法拉利係同C朗之前搞到車毀唔人亡嘅係一樣款（599GTBFioranoF1），今屆佢會繼承C朗件7號波衫，唔知係咪驚唔老嚟，早前就以15萬鎊甩咗，足足蝕咗成7萬鎊，但貴為曼聯球星，點可以冇部法拉利傍身，轉個頭佢就用咗17萬鎊買咗部FerrariCalifornia，真係姣婆守唔到寡。