動向飄忽嘅「天鵝」好難捉摸，天文台話呢個風唔強，不過航空交通卻頗受影響。白鴿黨甘威前晚開完雷曼聆訊會議，隨即返屋企收拾行裝準備上機，同太太、女兒去布拉格、維也納度假，佢搭嘅航班原定深夜11點幾鐘起飛，點知因為天鵝殺到，班機延遲又延遲，一家三口滯留機場10小時，喺機場酒店過晚夜，直至噚日朝早8點幾鐘先至起飛。
當白鴿遇上天鵝，可能真係唔係好事，白鴿黨副主席卿姐噚晚飛去日內瓦出席聯合國審議種族歧視國際公約會議，佢知道甘威滯留機場即刻話大事不妙，事關天鵝噚晚更接近香港，佢班機都可能受阻。泛民另一議員何秀蘭噚晚亦出發去意大利，如果唔好彩班機要延遲，有機會同卿姐喺機場碰頭。