天氣日日火辣辣，大家仲樂此不疲搶完寫真又嚟搶攬枕，㷫上加㷫。呢個時候，我覺得最需要係清爽降溫！嚟個遠離煩囂俗氣一日遊，睇睇平靜嘅碧海青天，原來好過日日「波濤洶湧」咁壓迫；一口氣玩勻幾個新鮮玩意，又好過日日o靚模無新意！不過，即使唔使同人逼，三十幾度高溫下，去玩唔該預備定四個轆，無車都要租番部囉！
記者：梁美甜
部份攝影：陳盛臣、陳陶鈞
Model：Benson、Leanne、Norain@PureModels
今次清新一日遊嘅路線，主打景點係馬灣公園嘅挪亞方舟同水晶吊車。沿途加插睇靚景談心，夠你玩足一日。
路線：荃灣碼頭→挪亞方舟→青山公路→機場核心展覽中心→屯門公路→青衣→青馬大橋→東涌
第一站 挪亞方舟返遠古開餐
我哋晨咁早就喺九龍出發，因為節目相當豐富，太晏起程肯定玩唔晒，第一步驅車直入荃灣碼頭搵位泊。因為第一個景點係馬灣公園同挪亞方舟，挪亞方舟喺馬灣公園內，係按照遠古記載建成嘅主題公園，仲擁有藍巴勒海景同埋青馬大橋景致。參觀完各展館最好就開埋餐，睇住靚景用餐，好享受！馬灣路為24小時限制區域，唔能夠揸車進入，所以要喺有船前去嘅荃灣碼頭放低部車。最近荃灣碼頭有灣景廣場同祈德尊新邨帝豪兩個停車場，兩者嘅入口都係喺海貴路，以收費睇，平日兩者相若，但周六、日則帝豪較經濟，不過帝豪嘅車位較窄。
挪亞方舟
開放時間：10am-6pm（每月第一及第三個星期三休息）
票價：平日$55-$100、周六、日及假期$65-$100
（建議於網上購票）
網址： http://www.noahsark.com.hk
交通：荃灣渡輪碼頭轉珀麗灣渡輪往返，票價$4-$8。
停車場收費
灣景廣場：平日$6/半小時；周六、日及假期$7/半小時
帝豪：$12/hr
第二站 機場核心展覽中心好Sweet睇靚景
食完午餐，折返荃灣攞車，入青山公路，悠悠閒遊車河，約十分鐘車程到汀九段，路牌會顯示「機場核心展覽中心」，呢個就係第二站。又睇展覽？唔係，係睇靚景！呢度有個咪錶停車場，相當幽靜，拍拖一流，最正係可以一眼睇晒馬灣同青馬兩條大橋，景色壯麗，就算夜景都一樣靚得震撼。雖然咪錶只有十多個，但一般情況下都唔會無位，泊好車，談談情，吹吹風，好Sweet。
第三站 東涌攬到實坐水晶吊車
談情唔可以談咁耐啦，因為仲有精采節目——坐水晶吊車！睇完景，由屯門公路取道荃灣、青衣，踩住100km/hr直入東涌，爽！目的地係纜車站，目標：夠晒刺激嘅CrystalCabin！昂坪360並無公眾停車場，最近可以泊東薈城停車場。於達東路嘅停車場入口位幾隱蔽，須於順東路轉入達東路，由於指示唔算清楚，小心錯過入口位。停車場分南北兩面，以南面停車場最近東涌纜車站，亦係最貴。如果泊車超過8小時，又或者東薈城停車場爆滿，可以泊去一路之隔嘅富東商場停車場，雖然屬公屋停車場，不過質素一啲唔曳。
昂坪360
開放時間：平日10am-6pm；周六、日9am-6:30pm
（8月17日至9月底會暫停六周作移纜工程）
水晶吊車票價：單程$73起；來回$104起 查詢：36660606
停車場收費
東薈城：南停車場$12/hr；北停車場$8/hr
富東：$10/hr（8小時以上日泊$80）
幫你搵租車優惠
無私家座駕都唔使愁，因為租車出遊一樣好方便，大公司仲不時會推出優惠，一般都係租多幾日有着數。如果日租，最平都只係七百幾，玩得過。
大昌千幾蚊玩五日
大昌行每隔一段時間就會推出新優惠，今個暑假就有「平日特價」消暑優惠，即日起至8月31日，可以用$1,640租5日型車仔OpelCorsa，又或者以$2,190租五日NissanLafesta七座位MPV。兩部車輪流用都得，盛惠$1,940。而一般日租就由$730起。即日起至9月30日，租車仲送兩樽加州礦泉水，夠晒體貼。
優惠期：即日至8月31日
查詢：27682277
Avis加一蚊有着數
Avis就出名車款多，連超跑限量版都有，當然亦有夏日租車着數，畀多$1就有好幾個選擇。日租八折，加$1蚊下次租車就六折，又或者周租加$1蚊，還車唔使入番油。而最平$760就可以租部Materia、Jazz又或者Corolla玩成日。不過一蚊優惠就要係星期日至四至有。
優惠期：即日至9月30日
查詢：28822927