人哋阿仙奴嗰邊周日喺阿仙奴4角賽，主場3:0大炒格拉斯哥流浪捧盃，呢邊嘅利物浦就相當爆，作客慘吞喺新球場出戰嘅愛斯賓奴3蛋，果然係一份好大嘅見面禮。
謝拉特變「柱男」
利物浦隊長謝拉特早前有單傷人官司纏身，周日場波算係佢復出嘅首場A級賽事；點知去到愛奴個哥利拿艾柏特新主場，呢位神奇隊長仲未黑完，一次勁射中楣兼一次罰球中柱，死未？跟住愛奴前鋒加西亞費南迪斯先開紀錄，喺呢個可容納40,000人嘅新主場，射入歷史性嘅第一球；我哋亞洲球員中村俊輔都名留青史o架，事關係呢位日本國寶助攻，加西亞費南迪斯賽後都話要多謝中村，等佢個名可以寫入球會歷史。
最後愛奴再憑賓沙夏梅開二度，喺新主場開齋大勝3:0，呢位車路士棄將入嘅第一球，仲射破門將連拿嘅大細龍門㖭！唉，出晒費蘭度托利斯、謝拉特同沙比阿朗素等主力嘅利物浦，真係唔知畀面愛奴，定係出盡法寶都贏唔到咯。愛奴贏夠3:0後會場仲大放煙花，攞景加贈興莫過於此！
主將嗌走買人碰釘
呢鋪紅軍輸得咁甘，我求大俠就覺得佢哋心事重重就真。沙比阿朗素講到出晒面咁話：「我經已諗盡辦法過檔皇馬，家陣我乾晒塘冇晒橋喇。」面對離心咁大嘅沙比，賓尼迪斯好無奈咁講：「佢同球隊仲有3年合約，希望佢留隊完成埋佢。」
聽賓帥說話好似好想留沙比咁，但聽講賓帥其實想賣走沙比套現，再加錢買華倫前鋒韋拿，不過對方註明韋拿係「非賣品」。紅軍接連受到挫折，唔怪得周日去到愛斯賓奴，會到輸0:3啦！