會考放榜前夕，煲呔噚日先後去學校同出席港台活動為會考生打氣，一日連走幾場，可見暑假真係幾淡靜。煲呔去到港台，鼓勵學生要永不放棄，又話有心事要向朋友、家人傾訴，唔好鑽牛角尖，同時應該聽吓朋友吐苦水，要以恒心、愛心同信心面對困難，懷住積極心情迎接放榜，總之例湯例水，一毫子新意都冇。
港台節目製作人員工會趁煲呔到訪，噚日朝即時召集人馬「歡迎」佢，十幾個着上紅衫嘅港台員工喺電台門口舉起「我要陽光，不要陰乾」紙牌，要求港府立即進行公共廣播檢討諮詢，唔好一拖再拖。
煲呔離開時主動走埋去笑晒口咁接收工會信件，正所謂笑騎騎，放毒蛇，八方奉勸港台員工都係小心啲好。工會主席麥麗貞話今次難得見到特首，希望佢真係聽到港台員工意見，盡快開始諮詢，否則港台妾身不明好難正常發展，工會期望有機會同港府最高層直接對話講述立場。