【09動漫節今日閉幕 隔空罵戰】
o靚模陳若嵐（Melody）日前聲稱在動漫節會場被非禮，雖然目前仍未拘捕犯案人士，但Melody卻意外地人氣急升。Melody昨日再現身出事的動漫節會場，同門的趙碩之和戴夢夢聲稱會全力保護。談到何超儀在blog上爆粗狂轟o靚模，Melody即出言反擊指她沒有資格批評。
日前o靚模陳若嵐（Melody）出席動漫節活動時，向記者聲稱被人摸臀非禮，其後更前往報警，直到現在仍未拘捕疑犯，但Melody在短短幾日間已經贏盡知名度。Melody昨日在非禮事件後再度現身動漫節，她封胸以便服亮相，而同門的趙碩之和尹蓁晞（Yumi）也收起豐滿上圍只騷長腿。
「人人都有父母生」
問到Melody心情如何？她說：「平復咗，今日有工作人員、助手同司機陪住我，相信唔會再有不愉快事件發生。」在旁的趙碩之表示：「上次係意外，叮咗Melody一個出去，今次我哋幾個人一齊，全面保護佢。」
提到何超儀日前在blog上爆粗狂轟o靚模，稱呼o靚模為「雞」，擺明指她們進行不道德交易，Melody聞言即出言反擊：「人人都有父母生，大家應互相尊重，冇一個人有資格批評其他人，每個人都有自己長處，我哋都係做自己嘢，又冇犯法，今日都冇過份性感，希望尊重番我哋。」而同是o靚模的Yumi也異口同聲說：「佢真係唔啱，唔係個個o靚模都有做呢啲嘢（指不道德交易），唔好因為一部份人做就話晒全部人。」
另外，昨日戴夢夢同場出現，她帶備自己剛推出的新碟突然有感而發說：「我噚晚睇《超級巨聲》，見到有個參賽者當年同我一齊參加新秀，佢話佢好堅持唱歌，我聽到真係百感交集，呢張碟我都等咗一年半先出到。」接着即雙眼通紅落淚，更和Melody相擁而哭。
明白出碟冇錢賺
問到是否被老闆忽略？戴夢夢表示明白出碟冇錢賺，反而出寫真則有不俗的利潤，但自己因冇身材故沒有想過出寫真另覓出路，但她聲稱從來沒有因此而埋怨老闆。
採訪：卓寶花
攝影：葉君海、陳志嵐
動漫節今日看點
動漫節來到活動尾聲，一眾o靚模、東洋魔女也陸逐離去，不過還有曹卓榣等ACGImageGirl、動漫女神趙碩之、戴夢夢和Melody等出席ImageGirl大賽總決賽及頒獎禮，比賽將於下午3時舉行。
