西環第二支管治隊伍執政為民，提供埋伴遊服務！自由黨近年暑期都會同中聯辦官員同遊內地，觀光之餘順道聯誼一番，雖然自由黨喺立法會敗陣，盛傳中聯辦唔睇佢哋，但原來雙方感情不變，今年觀光考察團如期出發，該黨幾名巨頭同一班新丁月中就會同副主任黎桂康暢遊西藏。
近來疆獨、藏獨多新聞，中央如臨大敵，喺國慶前夕入藏都算高危活動，隨團嘅田少話唔驚，可能覺得有中聯辦照住就冇有怕。原來田少都好期待呢次內地遊，佢笑稱連同佢自己在內嘅幾位黨內「老爺」，包括主席劉健儀、副主席張宇人同方剛，全部都未去過西藏，而且去呢啲地方都係越後生越好，所以大家未出發先興奮。
自由黨力證關係好
據聞佢哋會喺青海搭青藏鐵路入拉薩，不過田少同一班團友正在心大心細，唔知食中藥紅景天抑或西藥預防高山症好。中聯辦新主任彭清華唔會伴遊，但彭主任上任後已經同自由黨正式食過飯打招呼，引證雙方友誼甚好。
田少早前想將位於中環和記大廈嘅辦公室搬去旗下物業九龍灣ManhattanPlace，但唔少員工都非常留戀中環，加上業主冇勁加租，兼且喺中環方便見孫仔，所以田少以大局為重留守中環，唔使紆尊降貴過海返工。