黑客盜亦有「盜」！黑客藉垃圾電郵發放病毒嘅事情屢見不鮮，但最新一輪攻勢，居然係玩到冇嘢好玩，玩黑吃黑。資訊保安技術專家Symantec發出警報，話最近發現有黑客為咗吸引一啲有意入侵他人私隱嘅不法之徒上當，藉詞教人如何入侵MSN同電郵用戶嘅技巧，呃人落叠。
呢場網絡黑吃黑嘅原理係，黑客先以「想要偵破賬號密碼嗎？」、「想要一窺網絡的神秘嗎？」等題目引人上釣，再假借提供「專業賬號破解服務諮詢」為名，要求收件人以電郵回覆，仲要提供個人資料，然後承諾兩日內送上軟件。但醉翁之意不在酒，黑客得到收件人嘅個人資料後，就可以借佢哋戶口濫發電郵。
一山還有一山高，黑客居然諗到啲咁毒嘅招，《警訊》講得多，騙案通常都係源自貪念或者非份之想，今次中招嘅網絡用家，八方認為真係唔抵同情。