四十不惑，四十有一的和哥困惑沒剩多少，火氣卻依舊猛烈，尤其是談到切身之痛的足球、體育和球證。
青訓──足總冇重視
「過去10年，無論足總或球會都冇重視青訓。其實歷史已經證明，本地可以培訓到有質素的球員，問題是大家有冇心去培育接班人。好些球會話重視青訓，但隊內有幾多球員是自家培訓，繼而升上甲組隊？大家細心看出場名單便知道。
球證──你哋大晒呀
「我在球場外，見到球證會與他們打招呼，只是比賽時，他們好多判決令球員感到憤怒。現在球證執法時給我的感覺，是比賽時他們『大』晒，但他們所做的判決，好多時是錯之餘，仲要影響比賽。足球比賽有好多身體碰撞，但有些是真犯規，有些則扮嘢，我覺得球證好多時唔識分辨，結果作出錯誤決定，繼而影響到球員的比賽情緒。究竟佢哋事後有冇檢討番？我唔知道！」
體育政策──批資助不足
「香港相當富庶，在發展經濟時亦要兼顧文化、藝術同體育，社會才可平衡發展。可惜政府對體育的重視程度，比文化及藝術還不如。首富李嘉誠很慷慨捐贈學校，只是很少聽到大企業贊助體育，對上一次已是07年回歸10周年，『四叔』李兆基花幾千萬贊助搞回歸盃。其實香港有好多人鍾意做運動，只是體育的資助不足，場地等硬件明顯未能配合。」
家人談和哥
李太：盡責好丈夫
「我同和仔由拍拖到現在已經20年，彼此都較以往成熟；佢當年為了延長自己的球員生涯，加上為了仔女的健康，終成功戒煙。所有老公的優點也可在昔日的和仔、今日的和哥身上找到，可說是一個盡責的好丈夫。」
李嘉華：少教我踢波（兒子、13歲）
「爸爸做事好認真，但又唔會太限制我，願意讓我們嘗試不同事物。運動上，佢唔只鼓勵我踢波，所以我踢波之餘亦有參加其他運動；爸爸間中會帶我去踢波，但好少教我踢。」
李嘉裕：主動去溝通（女兒、10歲）
「爸爸平時喺屋企，好少講踢波嘅嘢，反而會抽好多時間同我哋傾計，不過話題就冇定，可以話無所不談，總之爸爸就好主動同我哋溝通，了解我哋嘅想法。」
