打工仔周末放假後返工，通常出現所謂MondaySyndrome（星期一症候群），八方都唔例外，常見病徵係四肢乏力，唔想起身，返到公司病情會加劇，腦轉數勁慢，嚴重者會答非所問，魂遊太虛咁。有人話呢個係不治之症，一般人要捱到星期二先會好轉，不過噚日下晝有奇蹟出現，好多MondaySyndrome患者知道天文台掛起一號風球後不藥而癒，當堂精神晒。
打工仔click爆
點解咁神奇呢？無他嘅，因為今年幾次打風都撞正周末，今趟可能係難得有機會喺返工日子打風，即係有可能多一日半日假期，打工仔唔緊張就假。因此噚日甫掛一號風球，人人都金睛火眼實天文台網站，當見到個風嘅預測路徑圖，有網民形容office全人類嘩然，事關如果天文台測得準，呢個風會直擊香港，咪好大機會有假放囉！
雖然有排未打到嚟，不過打工仔嘅群眾力量，卻先令天文台網站不勝負荷冧鬼咗。噚日下午3點幾鐘開始，好多人都上唔到天文台網站，上得到嘅亦發覺速度勁慢，連天氣預報都睇唔到。天文台表示，由於太多人想第一時間知道打風消息，結果搞到天文台網站幾乎癱瘓，直至傍晚6點鐘左右先恢復正常。
新台長李本瀅上任後，上星期將天文台網頁改版，將最多市民瀏覽嘅天氣資料放在一個版面上，呢項新猷原意係便民，應該算係德政，可惜「升呢」後卻發生網站塞爆事故，反而地下天文台網站全天候運作正常，真係諷刺。
根據天文台資料，喺天氣惡劣日子，網站單日瀏覽數字高達1,500萬次，去年點擊率更超越13億次，估計今個年度會達到15億次。市民關心天氣變化，對網站需求有增無減，今次未打風先爆機，八方真係戥台長擔心，萬一個風真係打到嚟，屆時咪好弊！
本年預算增一成
天文台本年度獲撥款1.86億元提供氣象服務，預算較上個財政年度差唔多增加一成，天文台話會繼續加強網站內容，又會進一步發展以互聯網提供天氣服務，納稅人畀多咗錢，天文台都要交足貨喎。
mailto:[email protected]