內地股市熱浪逼人，新股更係股市氣氛及投資者情緒探熱針，大大隻嘅中國建築A股，首日曾升90%，似乎新股神話無咁快玩完。香江呢邊，最威嘅新股金隅（2009）同琥珀能源（090）首日都只係升六成多啲，更令人覺得好戲在後頭。
今年以來最大宗集資額係忠旺（1333），喺首日跌穿招股價嘅頹勢下籌咗近百億元袋袋平安，下一站好戲將集中於幾隻銀行、內房、藥業同資源股。
被喻為「上海和黃」嘅復星國際（656），其藥業旗艦，可以話係內地嘅屈臣氏。旗下有金像、國大、及復星大藥房等多個零售藥店品牌，全國15個城市門市超過1000家，榮升全國最大嘅藥品零售連鎖店。其控有復星醫藥49%，而復星醫藥持有國藥47%股權，加埋喺美國上市嘅同濟堂15.94%，已完整咁打好一條由研發、生產、製造、分銷及零售嘅上下游產業鏈。
料終極阻力7.8元
一年一度燕歸來，去年6月2日股價見過6.65元（內含0.17元股息）後，用咗年幾先至再見番6.5元，舊年11月中更慘到連1.59元都見過，唔知嗰個仲以為間公司就嚟唔掂，幾個朋友連埋自己都輸唔少，於7.8元壯士斷臂，再一次證明「止蝕」係可以保命嘅，當然唔會等跌到兩蚊雞先至諗，因此，上次在11元水平買入而跌咗3成先至止蝕都覺得太遲，皆因一隻股票好哋哋無理由會唔見幾成，當佢跌咗超過5成，只要間公司唔係瀕臨爆煲，情願等運到，因為屆時再諗走唔走反而要驚走咗之後仲後悔。
唔少股民揸住蟹貨見終於到自己買入價，會急不及待計數離場甩身，但係有無發覺通常能夠有幸見番家鄉嘅股票，股價唔會就此行人止步，將股價圖表攞出嚟睇睇，每個蟹貨區即係股價於同一水平反覆一段時間才插水嘅密集區，難怪股價升抵該些位置會造成心理障礙，且會出現「一見發財」咁嘅表現。然而當下次股價再成功守於其上並進一步重越阻力又唔同咁講，只係今次情況有別於之前一浪低於一浪形態，仍不應判其死刑，6.5元唔只係去年6月高位，與去年2月水平相提並論更是雙頂阻力，也是去年1月底大型下跌裂口障礙，假如過得呢一關，以公司股價相對每股3.5元賬面值不足兩倍衡量，只要後市能夠守於5.5元之上，而成交繼續配合升勢，7.8元水平應該是較終極阻力。
胡孟青