男子組合ILoveYouBoyz（艾粒）同農夫前晚喺九展舉行最後一場「拉闊音樂擂台」音樂會，輪流唱出前三場表演嘉賓嘅歌曲，當中包括張繼聰、Mr.同陳偉霆等。艾粒同農夫唱到張繼聰時，改唱咗謝安琪嘅《囍帖街》，又取笑陳偉霆得到Angelababy撐場，少爺占話：「今晚我嘅baby都喺度，大家可以喺場內搵吓。」
艾粒同農夫得到EO2嘅Otto悉心安排，搵咗幾位性感女舞蹈員同佢哋跳辣舞，又請嚟RubberBand嘅泥鯭同蘇C傅成員阿豪扮成嘅軟硬贈興，掀起全晚高潮。事後農夫同艾粒接受訪問，問佢哋有冇向另一半備案跳辣舞時，有女友Jan撐場嘅Donald話冇，反而同林珊珊女兒拍拖嘅C君就直認話：「我報咗，仲報大咗，話會同女dancerkiss㖭！」
農夫同艾粒獻唱EO2同F4嘅歌，當唱到F4嘅歌時，少爺占搞笑話自己係周渝民，仲話唔要做朱孝天，唔知係咪嫌佢肥呢？
出人形咕
此外，少爺占另一個組合野仔噚日同Zarahn及MR.等喺銅鑼灣宣傳佢哋本月27日嘅音樂會，少爺占笑言當日會出人形咕。
