死，中國人一向忌諱。加上墓園經電視電影渲染，氣氛倍添詭異，一般人唔係拜山都唔會去。但其實距離鬧市不到100公尺的跑馬地香港墳場，是個以花園為主題的西式墳場，看落似公園般清幽雅緻，就連聖雅各福群會也定期帶遊學團到墳場參觀，講的不是鬼古，而是香港歷史。
記者：林佩婷
攝影：林栢鈞
Model：蔡嵐、盧俊廷
墳場定向教歷史
聖雅各福群會早年已有後顧無憂服務，為老人家提供完善善終準備。項目經理劉李林（Alan）話亦因此衍生了墳場導賞。「幾年前我哋社工幫學校搞唔同嘅培訓，教小朋友要有Gimmick，就諗到借墳場嚟做。好彩以前有博物館等做過有關研究，加上我本身鍾意旅行同接觸香港掌故，所以集中搵同香港歷史有關嘅墳墓資料，同事及其他人亦持開放態度。」3年前便正式開始了墳場導賞。
一代人物
二萬六嚴選30墓
香港眾多墳場中，Alan獨獨選了1845年正式開設的香港墳場作導賞地點。「首先香港墳場可公開俾人進入，又近市區交通方便，且以花園墓園為主題，貫徹西方墓園可隨時參觀散步理念，一啲都唔恐怖。裏面葬咗唔少同本土開埠歷史有關嘅人物，如革命烈士、官員、首富等，側面反映早期殖民地歷史、甚至對香港未來作出影響。最後我從2萬6千幾個墓地裏選了約30個作精選介紹。」
墓地解碼
精選的30多個墓地中，人物身份包羅萬有，好似香港第一大貪官高和爾、名人何東、革命烈士楊衢雲等墓地。「雖然話1845年先正式成立墳場，但原來最早1841年已有人葬喺度。除個人墓碑，仲有好多集體墓地例如日本人、兒童墳場等。另外墓碑唔同嘅裝飾都各有意義，例如天使吹號角代表等審判日來臨、墓台起高啲即想更接近天國，又或錨鏈代表海軍、東正教外形像極十字架的特別符號等……可從中了解唔同宗教或想法。」
聽聽屍體怎麼講…
推廣成旅遊景點
墳場導賞以包團形式參加，參觀年齡低至四、五年級都有，訪問當日就有20多位中學生參加，學校傳道人林生就話特地帶學生來見識。「現今學生同以前唔同，環境同教育所限，可能比較短視。參加呢個導賞團可以知好多唔同知識，了解自己生長地方。」3小時導賞若不停得個講字，很難引起學生的興趣，於是Alan想到用定向形式，自行繪製地圖及預備相片，讓他們自行找出相關墓地，藉以令行程更加吸入。由於導賞很受歡迎，甚至有持牌導遊跟他上堂，故希望將來能帶團到此，向遊客解構香港歷史。
遊園記：好鬼正！
持牌領隊包包：「希望能將此導賞當作來港必遊的新景點。」
馮同學：「未嚟之前以為會講鬼古，聽咗後覺得定向形式得意又學到嘢。」
Marisa：「開始時淨係覺得好鬼熱！但之後聽咁多歷史覺得好有意思。」
墳場導賞
人數：20-25人
時間：3小時
費用：$2,000/團
地點：香港跑馬地香港墳場
查詢：31549856