阿仙奴中前場猛將艾沙維早排響晒鑼鼓話唔滿意自己薪水，如果喺香港，佢或者可以搵李卓人幫手；但喺英國，佢只能用球場上嘅表現努力爭取。前日佢又嚟料，喺阿仙奴四角賽對馬德里體育會梅開二度，技驚四座，幫隊波贏2:1，球迷應該撐呢位「沙皇」，但唔知會方收唔收貨，肯唔肯成人之美？
艾沙維喺幾個月前，聲稱自己一直唔知英國要交重稅（收入一半），同佢喺俄羅斯畀開嘅13%差天共地，就算兵工廠畀佢8萬鎊（約103萬港元）周薪，計落仲搵得少過以前，所以向會方提出想加人工。平心而論，呢位俄羅斯球星入「廠」唔夠半年，好快已發揮作用，單係上季和利物浦4:4場波包辦4球已夠震撼，前日對馬體會亦有料到。
加拿斯都搵10萬鎊
呢場行情睇好嘅「大」戰，去到86分鐘至由艾沙維窩利入波，而轉頭馬體會就由柏捷高突破越位扳平。眼見係季前賽，又臨近完場，好多球員都開始行住踢，艾沙維就喺90分鐘高速推過對方門將射入空門。
睇球波明明推離腳，但佢仲可以高速追番個波，然後又窄位射入，絕對係爆炸力、射術俱備，有鬥心、有食力；當諗到連對馬體會失嗰球波包晒越位嘅加拿斯，都搵緊10萬鎊周薪；轉會去曼城嘅高路托尼都搵緊12萬鎊，艾沙維又真係唔止呢個價。
唔係得我求大俠一個讚佢，領隊雲格都係：「佢好早就知點融入隊波，而隊波亦知佢對戰局有幾重要。」既然有讚冇彈，雲格仲唔幫手做嘢？冇計，阿仙奴仲有成班年輕球員或者廉價勞工，好似墨西哥國腳卡路士韋拿，同埋前日場波同樣好有威脅，賽後仲被選為最佳球員嘅韋舒亞，隨便加畀艾沙維，可能引發加薪潮，怕且呢場「沙皇加薪戰」仲有排拉鋸。