《KOFXII》網上組隊3打3

格鬥Game集體翻生！繼PS3《街霸IV》令狂迷晚晚唔瞓煲紀錄，被視為十幾年宿敵嘅《拳王》（KingOfFighters），亦首度於PS3及XB360兩款家用機上，推出最新一集《KOFXII》。網上對戰固然係最強賣點，但唔好忘記，《KOF》採用3打3賽制，當儲齊兩Team人就有齊6個，咪話唔熱鬧呀！

記者：陳國輝　
攝影：陳盛臣

家用版增至22人

《KOF》系列出過咁多集，就連唔玩格鬥Game嘅機迷，都一定認識草薙京以及墮王龍呢兩位重量級人物。佢哋啲連招有幾霸道，拳王粉絲應該最清楚；不過喺家用版，除咗基本20名角色之外，仲額外追加多兩名女角。成立超過10年嘅格鬥網站「FightClub」成員就話，兩名新角色之中，Mature以高速度攻擊為主，喺遊戲入面點都着數啲；反之，Elizabeth齋用拳腳武術，想反擊真係有啲難度！
家用版另一特色，就係採用高清影像輸出，其中PS3更去盡1080p。成員之一阿Lau以及阿K也認為，對比街機版本，畫質明顯細膩得多，例如格鬥場上嘅背景和裝飾，睇得出勁細緻。

■FightClub會員隨時現身比賽，各位要操Fit自己先去參加。

■伊麗莎白．布蘭頓（Elizabeth）

■瑪卓亞
（Mature）

■兩名新角色嘅身高及體重都好近磅。

■上網搵對手隻揪之前，例牌需要先登記，後「開房」。

重播被擊倒片段

將《KOFXII》嘅3打3賽制放入Online模式，固然夠晒新穎，但係家用版又點止咁少元素！除咗例牌加插「畫廊模式」以及可上PlayStationStore買附件包之外，呢次仲加入超殘忍分唇「重演模式」；簡單講，即係將對戰情況錄低成片段咁解，世上有好多「高手」鍾意將玩殘對手嘅片段留為紀念，甚至自己睇都唔夠，仲要Upload上網任人觀賞，對輸家嚟講，當然係沉痛嘅教訓！

鬥格專家有Say
五月　機齡：15年

綽號叫「北茹」嘅五月，打咗《KOF》十幾年，覺得今次PS3與街機版操作近乎完全相同，暫時對新角色未夠熟練。