搞婚禮，早已衝出紅棉道和文化中心，台灣深圳亦已了無新意，預算低又要新鮮感，不如去韓國結婚，唔係首爾濟州釜山，而係你可能聽都未聽過嘅榮州，住傳統韓屋，仲可以測試男方是否知書識禮，女方是否嬌生慣養。不過當你後悔那一刻，可能已經米已成炊了。
記者、攝影：吳允沖
鳴謝：慶尚北道政府、韓國觀光公社
打鑼打鼓唱到行
這個傳統韓式結婚體驗絕對係一絲不苟，首先要集齊姊妹4個，燕瘦環肥皆可，唯一唔可以靚過新娘！新娘新郎換上韓式禮服，你以為着婚紗熱？韓式禮服足足有3層，着上身一樣不好受，梳好頭化好妝，還差一點胭脂，趕時間惟有用貼紙頂住先……睇落幾似keroppi幾cute喎！新郎哥都有閔大人咁英明神武！一切準備就緒，就要開始拜堂。樂隊先打鑼打鼓一番，大夥兒邊唱邊跳舞，一片喜氣洋洋之下，男女方互相鞠躬，其間男方要「遮醜」，儀式就是不停斟水、倒水、斟水、倒水……交換水杯再飲水，大功告成！可順利返房進行下一步。
韓屋非禮勿言
以首爾古蹟複製出來的韓屋，內有睡房和氣勢十足的大廳，但沒電視、沒Wifi，沒冷氣，只有棉胎被鋪，及無數昆蟲陪住你瞓，甚至浴室也是照傳統，興建在屋外，一切都回到朝鮮王朝時期，令你體驗當年老百姓的生活。獨對凉風秋月滿天星，除咗抱膝長談，以為最好洞房度春宵？Sorry，唔記得話你知，在下身處的儒生村，並不是韓式集古村咁簡單，官方稱是「為了振興韓國的儒生精神以及恢復人間道德而建立的」，非禮勿言非禮勿聽……所以我勸你都係唔好有非份之想。一覺醒來，何來有人朝早在打鑼，原來是人肉morningcall，果然貫徹始終呀。
儒生村
地址：慶尚北道榮州市順興面青丘里357
網址： http://www.sunbichon.net
住宿：雙人房每晚約$275起
婚禮體驗：約$1,216，須致電預約，參加人數4至6人
入宮嘆世界
韓屋體驗民間疾苦，真正享受在後頭。千年公園中的「羅宮」才剛建成不久，是全韓國唯一一間韓式宮廷酒店，韓版《花樣男子》都喺呢度取景。酒店中間沒有花園只是沙地一片，唔好以為尚未完工，其實這設計是特意留白，傳統是讓王帝腦筋清靜的地方。房中另一邊廂的主題公園，則仿照八世紀的4個城市而建，古色古香，更可體驗做玻璃吊飾、浸豉油等韓國傳統工藝。
新羅千年公園ShillaMilleniumPark
地址：慶尚北道慶州市新平洞719-70普門團地內
查詢： http://www.smpark.co.kr
Dos&Don'ts
囗機場文化體驗
在仁川機場的傳統文化體驗館，可以免費試作用韓紙裝飾的首飾盒，或用針線製作鎖匙扣，有專人用中、英文指導，30分鐘內完成，館內仲有傳統樂器表演。以後等上機唔使齋行DutyFree咁悶。
位置：機場3樓出境大廳
出門提一提
簽證：持BNO或特區護照毋須簽證。查詢：25283666（韓國領事館）
機票：乘大韓航空來回韓國仁川機場，票價$3,140起。
查詢： http://www.koreanair.com（大韓航空）
貨幣：1港元約兌158.1韓圜
（文中價錢已折算港元）
電壓：220V，兩圓腳插座
下周
韓國大邱有雨，23-31℃
