南華繼去年擊敗洛杉磯銀河及祖雲達斯後，昨日在Panasonic邀請盃中，藉炎熱天氣之助，憑前鋒陳肇麒下半場的「有運金球」，加上李海強的12碼，以2:0擊敗收起多名主力的熱刺，還令後者成為首支在今夏訪亞洲吃敗仗的英超隊。
南華為慶祝球隊創會百周年，特別邀請在港擁有不少球迷的熱刺踢季前熱身賽，可是賽事剛巧遇上本港今年入夏以來最熱的日子，結果只得2.3萬名球迷入場，當中包括近百名熱刺躉；他們全場不斷傾力唱歌打氣，令現場氣氛更「熱」。
有卡路士及雷文兩名巴援正選的南華，面對起用基爾洛頓及丹尼路斯等新丁的熱刺半場保不失。易邊後熱刺換入羅比堅尼及迪科爾，可是意外被南華陳肇麒的冷箭，「笠」死熱刺門將靴里奴高美斯而落後0:1；之後更再輸問題12碼，李海強操刀射入成2:0，疲兵熱刺在濕熱天氣下返魂無術。
陳肇麒：呢球記一世
射入金球的陳肇麒賽後興奮說︰「前鋒有機會便起腳，沒想到會射得咁靚，的確有運，這球一世都記得；領隊（金判坤）之前的地獄式訓練，確實提升了我們的體能，在今日酷熱天氣下比賽仍能應付。」由於這場比賽在外國也有直播，肇麒被問及會否被英超球探發掘時笑說︰「如將來有機會到日本踢已很開心，沒想過可以去英超。」南華擊敗熱刺後，球員可獲30萬元的獎金作獎勵。
羅傑承對票房失望
羅傑承賽後表示，門票收400多萬，相信可能出現數十萬元虧損：「非常失望，其實表面喺到笑，裏面痛緊，非常之痛。我覺得合格入場人數是3.2至3.3萬人，現在只得兩萬幾，比較失望。今次試賣平飛，如果都要蝕少少，可說一個指標，將來要認真諗諗，是否宣傳做得唔足，還是香港人唔鍾意睇香港足球。」
羅生表示，新援卡路士及雷文暫時只有六至七成狀態，但看到有一定質素，相信經過稍後的集訓可提升狀態。
本報訊
南華近季撼外隊唔輸蝕
日期：02/08/09
賽事：Panasonic邀請盃
戰果：2:0勝熱刺
日期：22/05/08
賽事：時富10周年英超意甲足球日
戰果：2:1勝祖雲達斯
日期：09/03/08
賽事：洛杉磯銀河表演賽
戰果：2:2和洛杉磯銀河（12碼勝5:4）
日期：22/08/07
賽事：公民60周年邀請賽
戰果：2:0勝神戶勝利船
日期：27/07/07
賽事：巴克萊亞洲錦標賽
戰果：1:4負富咸
日期：24/07/07
賽事：巴克萊亞洲錦標賽
戰果：1:3負利物浦
日期：23/02/07
賽事：BMA盃
戰果：2:2和橫濱水手（12碼勝4:3）
資料來源：《蘋果》資料室
Panasonic邀請盃昨日賽果
南華 2:0 熱刺
入球者（南華）：陳肇麒52'、李海強69'（12碼）
入球者（熱刺）：/
天水圍飛馬周年紀念盃昨日賽果
天水圍飛馬 0:2 特羅薩薩納
入球者（天水圍飛馬）：/
入球者（特羅薩薩納）：胡迪查49'、阿倫52'
入場人數：23,025人
購票人數：18,966人
門票收入：4,043,750元
花絮：文彼得識換波衫
同英超球隊踢波，交換波衫當然唔少得，南華新貴李威廉當然唔執輸，想向艾朗連儂埋手，可惜對方唔騷佢，轉移目標問丹尼路斯，又慘食多次「檸檬」；反而文彼得（左）就醒啦，下半場初段就同羅比堅尼（右）講定先，咁咪唔使面懵懵囉！
花絮：貴價玻腳玩3分鐘
據報300萬年薪嘅玻利維亞國腳卡斯迪路（圖），前日落機時仲話狀態大勇，南華領隊金判坤仲聲大大話會畀佢落場；係就係有落場，但臨完場前3分鐘先換入嚟，同熱刺嘅奧哈拉撞咗吓就完場，唔通真係等對傑志場慈善盾先見真章？
花絮：熱刺狂迷貓咗搞事
英格蘭嘅球迷出晒名鍾意搞事，一班懷疑飲大咗嘅熱刺迷，噚日輸咗波後唔願走，仲衝落球場，好在工作人員捉得快；有個激進派仲唔知衰，臨走仲要拎啤酒潑工作人員，好在差人叔叔大人有大量，如果唔係拉晒佢哋都有之！
花絮：擁南躉傳唔到旗
擁南躉賽前用幾萬蚊整咗面火紅大旗，上面寫埋「亞協盃南華必勝」，諗住今場攞出嚟打氣，仲聲言話會傳旗傳勻全場，點知最後不了了之。點解？梗係啦，成班熱刺球迷坐正喺隔籬，真係睬你都儍！
球迷反應
