5月31號主打漢國置業（160），博漢國翻半番，漢國家陣累升近30%，再定目標價，現水位博翻半番。漢國呢期預售祖國寶翠園1期及越秀區北京路5號公館，預售收益上到5.73億銀，成績已經靚仔到不得了。據上星期報載，若果連同寶翠園2期推售，漢國全年應該可以套現高達10億銀。
要咁睇，祖國樓市開始火熱，估計漢國預售物業，應該繼續熱賣，而嚟緊2010年度及2011年度業績，靚仔到爆。漢國最新市值11億銀，連預期可套現金額，幾乎相等於漢國市值，漢國殘到痹。
再講，漢國最新NAV6.56元，現價（2.48元）折讓，仍然高達62%，當好多內房股炒到甩轆，漢國仲有咁大折讓，吸引到痹。5月定漢國目標價2.86元，呢次推高漢國目標價，現水位博翻半番到3.72元，漢國重估前折讓，仍然高達42%，仲係超級大落後。
英皇證券有point炒
英皇證券（717）挨近上市以嚟低位，值得。呢期港股暢旺，加埋上市集資或者融資活動，又再活躍，市場憧憬證券股業績回升。熱門證券股好似大福證券（665）及結好控股（064），亦見有資金追捧，前邊大福，上星期五更加創咗1年高位。同樣道理，英皇證券係有point炒。
再講，集團最新NAV0.62元，現價（0.45元）折讓27%，相對同業，一啲唔輸蝕。短打博集團上番1倍PB，英皇證券現價要升38%。
錢雋