卿姐從政多年，被譽為第一代「民主女神」，強悍作風當今女政客無出其右，近日佢多咗個朵，就係「民主女財神」。
白鴿黨年年賣獎券籌款，係其中一個主要收入來源，除咗上街向市民兜售，大部份都係拍膊頭搵自己友認頭。今年明星級馬丁冇落區籌款，黨內估計籌款數字或略受影響，點知埋數時有驚喜，原來入黨唔夠一年嘅卿姐先係真正「抽水機」，吸水能力嚇人一跳。
賣獎券籌22萬
八方睇過一份民主黨立法會議員籌款成績表，單係卿姐一人已籌到22萬元，個人籌款總成績名列黨內首位，緊隨其後分別係涂謹申同黨主席仁哥，不過數字已經差一大截，至少相差10萬元，分別籌到逾12萬元同10萬元。其他幾個議員都唔夠10萬蚊，推銷獎券能力似乎差少少，鄭家富籌到51,600蚊、高達45,000蚊、肥仔明同張文光分別交數20,000蚊同10,000左右，黃成智明顯失色，只有4,000幾蚊。九個議員當中，新丁甘威敬陪末席，個人籌款成績係「零」，因為佢要幫港島區兄弟落區籌款，自己冇孭數。