古着開倉　森美尋珍

森美有幾熱愛古着就不用多說，他與古着王美華氏相識十幾載，隔一排就必會「巡舖」掃貨。撞正呢期美華氏夏日大割價，幾乎全店以清倉價開賣，花多眼亂唔知買乜好？搵埋森美教路執平嘢，尋至「珍」筍貨，再醒你揀Vintage小貼士，Shopping買嘢就唔使做盲頭烏蠅啦！

記者：葉雪芯
攝影：林栢鈞、王文忠

藍色夏威夷花恤衫
原價$198
半價$99

草帽
原價$198
半價$99

大哥揀心水

廢話不多講，馬上入正題。森美到場當然即刻搵佢揀心水貨，他說念書時期已鍾情夏威夷花恤衫：「夏天嘛！夏威夷恤衫通常都夠花夠colourful，夏天有啲顏色無咁悶，而且容易襯，方便快趣。」另外，店內改裝恤衫都是他的目標：「唔好成日都搞潮童Look啦，要型都可以好紳士，斯文Look必定揀Chaps同RalphLauren，玩GentlemenStyle，好正o架！下身襯條Dickies卡其色斜布褲，Roll起褲腳，襯對帆船鞋，掂晒啦！」講到揀Vintage，森美精明到可以開班授徒，難得佢一場嚟到，點都要佢醒幾招傍身，他說：「要睇件衫有無vintage味，一睇tag就知，以前的tag通常用類似紙製，而後期年代的tag就多數是尼龍纖維製的。」而講到揀古着Tee，森美話一定要睇Size和質地：「八十年代的Tee較闊身且短，自己則比較喜歡七十年代收身又長一點的款式；但講到質料，我又會喜歡八十年代後期的全棉，我好怕早期50/50（50%棉，50%人造纖維）料太薄，夏天出汗會濕到一笪笪。」

■森美教路，八十年代古着tee比較闊但短身，而且多數是全棉，夠厚身。

■八十年代後期出產的tee，圖案開始用燙畫技術，鮮色但較為焗身。

全店古着割價賣

其實相約森美「巡舖」前，小記早到半粒鐘打算先睹為快，眼尾餘光已經見到有不少正嘢，例如RalphLauren年輕副線Chaps的PoloShirt，$40唔使有得執；Abercrombie&Fitch和副線Hollister亦是今次清倉座上客，話晒係古着王，開倉都零舍有料到，特別的是今次減價貨色連少有兼靚版的Premium系列，家陣都減到一百蚊，計落又係半價埋單；最筍之重頭戲當然是招牌貨古着Tee，開倉價$28，平過一餐Lunch；值得推介的還有食正環保熱潮的各款ToteBag，減到$18一個，認真抵！落到舖確實輕易執到又平又正的至「珍」古着寶！

RalphLauren藍白直紋改裝恤衫
原價$299
半價$150

Dickies美版卡其色斜布長褲
原價$298
二二折$68

棗紅色校園LogoToteBag
原價$78
二三折$18