令筆者回味嘅宮崎駿作品，依然係廿幾年前《龍貓》同《天空之城》！唔係話近年作品每況愈下，只覺得《千與千尋》、《幽靈公主》等似乎失去童真；今日睇過《崖上的波兒》，再重拾呢份感覺，更難得雙碟版DVD竟收錄宮崎駿筆下嘅手繪分鏡，一幅幅手稿配合人聲配樂重播一遍，純漫畫感覺，夠特別！
記者：陳國輝
人魚奇妙之旅
睇過N咁多齣人魚題材故事，內容發展係點，大概已經估到！波兒都係人魚，但唔係美若天仙嗰隻，佢得5歲，思想天真，但已懂得何謂愛，更為咗同人類生活，甘願放棄魔法，變成凡人，旅程中佢受到多重考驗，究竟係咪大團圓結局？
傳統手繪再回味
近年CG動畫係發展大趨勢！無錯，好似迪士尼或夢工場，相比以前質素已經提升好多，無論角色塑造、物理效果，甚至用MotionCapture製作流暢動作，統統都真實咗；但諗番轉頭，話明卡通，咁逼真做乜先？《波》聲稱是宮崎駿的「手繪」動畫、不含CG，尤其筆迹風格、顏色用料上更容易睇得出，像回到八十年代日本，配合埋大海洋、大自然為背景嘅劇情，簡單似乎仲啱Feel。
天馬行空冇得估
鍾意睇宮崎駿另一原因，相信係天馬行空嘅構思。《波兒》係神仙定妖怪，毋須特別深究，更有人睇完話波兒竟然係條金魚，簡直不合情理！以平常心睇宮崎駿作品，太理性可能令自己睇得唔舒服，相反，要加啲童真，畀啲想像力，例如不要問點解波兒明明係魚，又鍾意食火腿；海嘯過後，點解海洋上會出現泥盤紀史前生物？
手偶波兒炒過千
Blu-ray行貨要年底推出，但DVD雙碟裝亦唔輸蝕！Bonus包括完整101分鐘「分鏡腳本」，播放時仲會聽到原聲日語配音，大家可從另一角度重新欣賞《波兒》嘅手稿動畫。
此外，購買DVD再加任何三款宮崎駿動畫工作室DVD，更免費獲贈日本電影版波兒手偶一隻；由於贈品屬限量版，有傳聞話Yahoo拍賣網已被炒上千元，係咪咁離譜就不得而知，但身為宮崎駿Fans，肯定想收為己有。
Profile
片長：101分鐘
視像：1.78:1
特別收錄：分鏡腳本、電影預告片
音效：6.1SurroundDTS-ES、Dolby2.0
字幕：中、英、日
語言：粵、國、日
查詢：洲立（24188883）
