盛夏之際，原來已屆秋後算賬之時！「皇后衞士」何來同朱凱迪兩年前入稟法庭，司法覆核挑戰政府清拆皇后碼頭決定，結果敗訴；事隔兩年，政府近日突然追數，要求兩人支付27萬元訟費，呢個唔係小數目，所以兩人近日都頗為惆悵。
一人一蚊撐皇后衞士
政府忽然追到上門，好多當日挺身而出保衞皇后嘅人知道朱凱迪咁慘，即時伸出援手表示撐硬佢。網上聲援皇后衞士者眾，有人喺facebook發起「救救皇后鬥士朱凱迪」群組，呼籲捐錢幫佢找數，更建議玩大佢，「唱」散27萬元做一蚊硬幣，再召集網民去律政司排隊畀錢；或者舉行街頭「掟響律政司」籌款活動，好似去遊樂場玩掟公仔咁，畀市民掟爆特區高官頭像洩憤，又可籌錢，一舉兩得。
博客林忌話今鋪不能見死不救，「當底褲」都要拎錢出來，佢同八方講，估唔到港府可以咁無良，所以發起群眾運動支援朱凱迪佢哋。林忌指，保育人士都係深愛香港本土文化嘅人，如果特首煲呔、律政司司長黃仁龍收咗呢筆錢，真係愧對廣大市民。
朱凱迪噚日參加悼念皇后被拆兩周年活動時，話自己身家微薄，絕對冇可能支付廿幾萬元律師費，況且政府秋後算賬太過離譜，所以佢唔打算畀錢，大不了破產了事！雖然朱凱迪有捨身成仁悲壯精神，不過佢啲朋友卻唔忍心佢俾政府逼到破產，攝影師謝至德話，願意捐出其新作攝影集《皇天后土》收入，如果2,000本沽清，扣除成本都有十幾萬元幫補吓。
未決定點回應律政司
各方友好願意兩脅插刀，然而朱凱迪同本土行動方面好審慎，據知由於佢哋仍未就如何回應律政司有共識，唔畀錢定係再講數或以法律途徑抗爭，目前未有定論，所以暫時唔會立即接受捐款，但歡迎熱心人士在facebook先「篤手指」認捐，表明願意捐幾多錢，目的係向政府顯示大家唔會俾個銀碼嚇窒。假如日後有真正需要，先通知大家正式捐錢未遲，家陣齊齊為朱凱迪打氣就夠。GodSavetheQueen，皇后冇理由唔保佑捨身救佢嘅人啫。
mailto:[email protected]