藝術強與太太去行書展，買咗幾本藝術史、法國藝術之類嘅書籍，正想繼續行去台灣館，睇吓有乜新書之際，手機響起，公關Ｃ來電急call：「強哥，知你今日行書展，有事相求，我老闆聽聞o靚模破壞書展文化氣氛，毒害青少年，佢想公開譴責之，但我勸佢未睇過o靚模寫真之前，唔好妄動，以免俾記者笑番轉頭。唔該你即刻幫我去買兩本o靚模寫真，我仲開緊會，一個鐘頭後在會展大門口交收。」藝術強與公關Ｃ相識多年，交誼甚深，唔好意思拒絕，唯有拖埋老婆去搵，但唔知書攤在那方，唯有問人，人哋上下左右咁望佢幾眼，面有不屑之色，搞到藝術強非常尷尬，卒之問到嘞，行埋去，見有記者猛咁影相，藝術強太太即刻彈開幾呎，推老公行埋去買，藝術強拉高衣領，遮遮掩掩咁行過去，人哋問佢買乜，佢又唔知，唯有手指指兩本當眼嘅，問過價錢，交錢即鬆，幾乎慘過做賊，到書展買書買得如此狼狽，係佢人生第一次。
交收之時，公關Ｃ打開睇吓，書名Kama與Angelababy，多謝連聲，話即刻拎去畀老闆，藝術強喝住：「喂，買得咁辛苦，畀我哋望兩眼啲圖片先。」公關Ｃ三人於是站在路旁睇o靚模寫真，藝術強太太哇一聲，「唓，啲人抗議乜嘢呀，叫你老闆千祈唔好做埋道德派代表呀，呢啲圖片差過《蘋果》娛樂版平時啲圖片好多，有乜好抗議啫，抗議啲人一定係故意為o靚模宣傳造勢就真。」公關Ｃ聽咗，唔知點好，嘈開去，益晒啲o靚模代理人啦！
藝術強告知左丁山呢件事，左丁山想起二十幾年前鄭大班出版中文版《花花公子》，出盡招數宣傳，出版一本《鄭文雅寫真集》，係日本攝影名家嘅傑作，暢銷一時。嗰陣時鄭大班成日想俾道德派抗議，點知冇乜人嘈，嗰陣時又冇互聯網，冇網上聯署抗議等事，幾冇趣呀。唉吔，今日就唔同咯，做宣傳易到極，鄭大班唔恨得咁多！