書展熱賣o靚模寫真集，動漫展更加瘋狂，退休高官陳太早就對呢啲嘢睇唔順眼，上星期寫blog批評呢啲寫真「近乎色情刊物」，根本唔應該歸類為「書」，今個禮拜再發炮，指雖然好多人認為o靚模風氣冇問題，不過佢始終認為，書展目的應該係推廣有益身心嘅健康書籍同閱讀風氣，「而非成為稱不上書的o靚模寫真集的促銷場」。佢希望貿發局明年籌辦書展時，同教育界、家長團體、出版社各方面商量尋求妥善安排。
陳太強調自己唔係封建守舊，只係覺得成年人有責保護青少年，佢指o靚模唔係單一現象，當索K成風、少女以做o靚模搵快錢為榮、少男少女對網上援交視作等閒嘅時候，係咪應該由呢啲情況繼續放呢？