近日股市比較波動，好淡言論繼續鬥爭，看淡的認為股市同經濟脫節，遲早歸於平淡；投機者則認為只要資金充裕，大市升完可以再升。其實兩者都有道理，只係時間上分別。德國股神科斯托蘭尼說得好，股市總是在恐懼中向上爬，上周三大市就因A股倒水式下挫而急跌至20000點樓下，投資者正在問發生咩事，周五港股卻重上近日高位。
內地股市依然係政策市，仲要係半封閉市場，所以投資者反應可能會較大，但中央推行政策，通常會放幾次風，筆者相信資金氾濫下，應冇咁快大跌。跌市本應撈貨，但筆者早前已入到成手股票，急跌之下又未到理想撈貨價，只係酌量撈心水異動股。
把握機會長揸心水股
筆者一直都認為好友力量仍掌握大局，所以應該手持一定數量的個股旁身，但突然急跌下，唔少投資者又係再「睇定啲」，倉位依然好「吉」。筆者唔知大市會唔會回落到投資者心目中的理想入市價，但牛市理應享受升幅，而不是望股升而興嘆。雖然筆者都認同市場人士憂慮，大藍籌在海嘯之後，未必可以即時交出亮麗業績，但與其等大市回落，不如把握機會搵心水個股長揸，因為並非全部個股都會跟大市行，就算大市回調，都有好股會升，就以筆者一直看好的威勝集團（3393）為例，雖然一路升一路套利，手上已套利近半，但由三月升浪至今，威勝一直不負所望，跑贏大市，不但在基本面向好，技術面一樣有好表現，雖然上升空間已縮小，但冇咩成本，所以筆者亦繼續持有此股。
其實要贏錢，唔一定要手持很多股票，好股一兩隻已經足夠，就以筆者之前提及過的金山軟件（3888）為例，此股以網遊為業務，在上升的過程中，其實不乏壞消息，例如早前有報道指個別網遊帶有賭博成份，或涉及網上金錢，就引起了中央的關注，亦可以預期在網遊日益流行下，伴隨會有相關管制，在此陰影之下，不少網遊相關股都有回調，不過金山軟件依然企硬。以公司規模而論，此股增長及上升空間應比同業騰訊（700）為多，而且騰訊快將公佈業績，如果成績不俗，相信對金山軟件亦有利好作用，讀者不妨留意。
順帶一提，由於大市已轉牛，士佳應該同讀者有更多交流，所以由明天開始，本欄將改為逢星期一至五跟讀者見面，齊齊乘風破浪。
張士佳