「望到我頸都長，企到腳都痹！」政府物流服務署本年初公開招聘60個二級物料供應員，由於入職最低要求僅中五畢業，月薪卻有逾萬元，故吸引萬幾人申請，但至今差不多半年，已面試申請人仍未獲回音，一眾待業等開飯人士心急如焚，透過互聯網互通消息，問吓究竟有冇人已獲聘書，好多人批評物流署做嘢慢吞吞，如果等呢份工救命隨時要燒炭。
萬人申請 面試約770人
八方問過物流署，署方話共有10,700幾個人申請呢個基層公務員職位，當中有3,800幾個有大學學歷，該署當然冇in晒所有人，只有770幾人有機會面試，當中大約300人係大學生，招聘程序接近完成，今個月會出聘書。
原來要in成700幾人，以政府官僚程序，其實花幾個月時間都已經算快手，各位網民等咗幾個月，畀多少少耐性等多陣啦。有曾參與面試者喺網上爆料，話一齊面試嘅人唔少係大學生，有人更聲稱係碩士，所以佢打定輸數，「大學畢業嘅要in成10分鐘，我6分鐘就in完走得，實冇行啦。」網民yipsiuyee勸大家唔好咁悲觀，「其實家搵政府工好似買六合彩，好多時唔係睇學歷同經驗，係睇你好唔好彩。」